Tanto e masterclass como e cursonan nobo di sketch portret tabata full caba e prome siman cu nan a ser ofreci. Y ‘wachtlijst’ pa su proximo cursonan na september 2021 ta creciendo… Un curso di arte exitoso na Hulanda, cu o sin Covid!
E famoso pintor Caribeño, di Aruba, specialista den pinta portret, Gustave Nouel (www.gustavenouel.exto.nl ), ademas di su carera internacional di arte, tin hopi experencia pintando portret riba caya na diferente país, hunto cu mas artista. Danki na e experencia internacional aki Gustave Nouel (GN) a crea un curso efectivo y exitoso pa pinta portret, cu e ‘secretonan’ y base universal di artistanan riba caya. Esaki ta hasi pinta portret hopi fasil… Tambe pa principiantenan! Actualmente GN ta ofreciendo e curso nobo aki y ‘masterclass’ di pinta portret na ‘Kunstcircuit’ (www.kunstcircuit.nl), e centro di Arte principal di Deventer. Cursonan mester start 19 y 20 di januari 2021, si nan no prolonga e ‘lock-down duro’ na Hulanda.
Tambe na Museo Terramar ( www.terramarmuseum.com) di Bonaire, workshops y performance di pintamento di GN a ser planifica, na 2020. Dos biaha nan a ser posponi, pa causa di Covid… Awor, despues di pospone e workshop pa January 2021, Museo Terramar, tin workshop y mas actividad artístico di GN riba nan programa, di 1 te 9 di mei 2021. Riba 9 di mei (Dia di Mama) intencion ta pa presenta e buki ‘Maternidad’, di Zuleika Coffie y Gustave Nouel, na Bonaire oficialmente. Caminda e dos autornan lo firma algun di nan buki y hopi mas sorpresa!!
Gustave ta sigur cu e cooperacion cu Museo Terramar, lo duna su frutonan. Tambe na Corsow y Sint Maarten, tin interes pa su workshops exitoso y pa presenta e buki ‘Maternidad’ y hasta tin contacto caba pa cooperacion cu e Museo (info@terramarmuseum.com).
Biblioteca Nacional di Aruba, (directora Astrid Britten), a mustra interes pa presenta e buki ‘Maternidad’ den e cuater lenga mas papia na Aruba, cu ‘imagen/pintura’ di pintor Gustave Nouel y ‘poesia’ di actriz, modelo y ‘modelcoach’ Zuleika Coffie! Esaki combina cu un eventual exposicion (digital o real) di pintura cu a ser pública den e buki ‘Maternidad’. E projecto por conta tambe cu apoyo di Departamento di Cultura (director Siegfried Dumfries). Sin embargo, un fecha concreto pa presentación na Aruba no a ser fija ainda.
Un soño di Zuleika Coffie y Gustave Nouel ta cu e buki y projecto ‘Maternidad’ lo stimula mas projecto artístico y hasta mas intercambio cultural entre e islanan hulandés den Caribe, den futuro, despues di Covid-19.
