Na final di luna di augustus e grupo Nos KIer Husticia a entrega un carta na representacion di Hulanda na Aruba ya cu ta trata di un carta dirigi na Secretario di Estado Alexandra van Huffelen.
Den e carta nan ta bisa cu kier expresa nan preocupacion pa loke ta tardansa den investigacion di Ministerio Publico den casonan di corupcion gubernamental na Aruba.
Nan ta papia di actonan inhusto y casonan di corupcion na Aruba cu no ta wordo investiga. Nan ta bisa cu si haci un comparacion entre OM di Aruba y esun den e otro partinan den Reino, por conclui hopi lihe tin algo robez cu OM na Aruba.
Asina nan ta bisa cu no ta actua mes diligente contra white collar crime en comparacion cu delitonan mas comun di e ciudadanonan comun y coriente. Nan ta sinti cu casonan mescos mester haya e mesun atencion y trata di e mesun forma pa tur ciudadano. Esaki ta sosode den otro partinan di Reino pero no na Aruba.
E grupo ta persisti cu OM no ta actua di e mesun forma ora cu tin politiconan como sospechoso. Of no ta haci suficiente pa haya condena pa politiconan sospechoso.
Pa un procedura husto, ta kere cu OM den tur casonan di corupcion mester haci investigacionnan rapido y di forma eficiente, pa despues pasa pa persecucion y cu henter pueblo haya e siguransa cu husticia ta wordo sirbi.
Ta sinti cu cu e team cu Aruba tin, un PG y 5 Fiscal, ta suficiente pa casonan simpel den un comunidad chikito. Pero ora cu ta trata di casonan compleho di corupcion y labamento di placa, cu hopi biaha tin di haber cu uzo di paraisonan fiscal y labamento di e placanan ey, no ta suficiente. Hasta si uza tur e fiscalnan den un caso asina grandi, lo por dura algun aña prome cu finalisa tur e fasenan cu ta finalisa cu e parti di huicio.
Esaki tin e pueblo preocupa, pasobra ta mira cu husticia no ta wordo uza. Mas ainda ora cu ta trata di politiconan elite, esta cu nan ta keda sin ricibi nan castigo.
Nan a duna ehempel vcon e diferencia di castigo ta den e caso di Gerrit Schotte y esun di Paul Croes. A conclui cu tin un diferencia grandi den e castigonan impone den e dos casonan. Mas ainda ta cuestiona cu Paul Croes no a sinta te ainda ni un dia di su castigo y awor a hiba su caso Cassacion.
A señala cu dos fiscal tin laso directo cu of ta familiar di personanan envolvi cu un partido politico cu cada bes ta envolvi den casonan di corupcion. E impresion cu nan tin ta cu casonan cu tin pruebva palpabel no ta wordo hiba dilanti of hasta ta seponeer nan.
Un di e casonan cu nan ta señala ta esun di exprome minister Eman, kende a haya placa di un di e labadonan di placa mas grandi di mundo, cera na Merca: Roberto Rincon. Investigacion den e caso aki nan ta haya ta bay demasiado lento. E conclusion of pensamento cu nan tin ta cu riba un isla chikito, ta mas facil pa influencia funcionarionan. Asina nan ta trece mas punto dilanti cu por lesa den copia di e carta aki.
