Dia 25 februari venidero grupo di baile “Nos Cultura” bou giua di Judith Martha lo homenagia sr. Robert Maduro pa su amor y esfuerzo cu e ta brinda pa cultura di Aruba. Esaki lo tuma lugar na auditorium di ex John F. Kennedy na unda cu su sernan keri y amigonan di cerca tambe lo ta presente. Robert Maduro no ta un
persona desconoci na Aruba, hopi hende conoce como un gran musico cu ta stima su cultura, tin cu conoce como un locutor na radio, y tin cu a yega di traha cune den su carera profesional.
PERSONALIA
Robert Frank Maduro a nace na Aruba un 28 di juni 1967. Robert ta unico yiu di su mayornan Alida Maduro Geerman y Renulfo (Dai) Maduro. Robert ta comparti bida cu su Sra Marianela Wouter y hunto nan tin tres yiu, un yiu muher cu ta
Sharyl Maduro y dos yiu homber cual ta Brandon Javier y Robert
Frank Jr. Maduro.
COMO PROFESIONAL
Robert ta ambtenaar den servicio di gobierno for di aña 1993 ocupando diferente funcionnan tanto na Dienst Technishe Inspecties (1993 – 1996), Ministerio di Cultura, Turismo, Salubridad y Deporte (1996 -2001), Instituto di Cultura Aruba
(2001 – 2009), Ministerio di Asuntonan General ( 2009 – 2013) y di 2013 te cu awe Robert ta traha na Departamento Di Cultura Aruba y ta eherciendo e funcion di coordinador pa cu Organisacionnan Gubernamental y no Gubernamental di Aruba ariba e tereno cultural pa gobierno.
COMO LOCUTOR
Como locutor Robert tin varios aña den e medio aki cu ta radio diffusion. Robert a traha na diferente emisora e.o. Radio Revolución, Bo Guia FM, Power FM y te cu awe e ta formando parti di e team di Radio E Superstacion Canal 90 FM.
COMO MUSICO
Robert su interes pa musica a cuminsa for di chikito. Como hoben, e tempo ey na La Salle College, Robert a topa cu dos maestro cu a descubri su talento y a motiv’e pa sigui den musica. Robert su carera musical a cuminsa na e mesun La Salle College momento cu ta forma un grupo di gaita pa un celebracion di fin di
aña na scol. Despues di esaki e ta ser aserca dor di su amigo, pa forma parti e tempo ey di Tipico Placentero. Robert a cuminsa den Tipico Placentero como timbalero y despues e grupo a introduci cantamento, y aki ta caminda e nomber a cambia pa Placentero Ritmo y Cuerde y tambe e exitonan a cuminsa. Placentero Ritmo y Cuerde ta un agrupacion cu a revoluciona farandula aki nan Aruba den añanan 80 y 90, dor cu nan tabata hobennan tocando nos musica tipico y folclorico. Akinan Robert a descubri otro di su gran talentonan, esta composicion. Robert a cuminsa compone y graba su mesun cancionnan y hunto cu Placentero Ritmo y Cuerde tabata produci y graba casettenan, disconan y despues cd-nan. Tur esakinan cu hopi exito. Robert a participa na diferente ocasion na Festival di Dande y a sa di conquista e titulo di Rey di Dande na cuatro ocasion.
Den festival di Tumba Robert a sa di participa na numeroso ocasion na unda e la wordo premia diferente biaha pero nunca a logra conquista e titulo maximo. Mas serca cu e la logra di yega na e corona ta como prome finalista. Tambe Robert a participa varios biaha na Calypso y Roadmarch Contest na unda tambe a logra bai cu algun premiacion.
Na aña 2000 Robert ta lanta su mesun agrupacion folclorico cu ta Robert Maduro y Su Alma Folklorico. Cu e grupo aki Robert a produci mas cu 15 disco compacto, a logra un sin fín di exito y a sa di hiba nos música folclorico riba e plataforma internacional. Robert como musico y cantante a traha y graba cu diferente bandanan y gruponan musical e.o. Grasshopper Band, TIGO, Los
Pimentosos di Vicente Kelly, la Nueva Fuerza, Agrupación Blade, Sensación del Caribe, Los Parranderos, Rincon Boysz, Banda BADU y ultimo aki te cu día di awe su mesun agrupacionnan cu ta Alma Folklorico y Azucar. Robert semper a boga y traha pa conserva, promove loke ta di nos, nos tradicion, nos folclor y cultura di Aruba tanto local como internacional ora esaki tabata posibel. Algo cu Robert semper a pidi na tur hende ta pa nan stima, mantene y promove nos cultura pasobra no tin cultura aki nan mundo mas bunita cu esun di nos Aruba. P’esey nos di grupo di baile “Nos Cultura” kier a gradici Robert den un forma di un
homenahe pa kico tur e ta haci pa nos cultura.
