E caso di Interbank ta un ehempel clásico di e capitalismo salvahe. For di 2005 mi persona ta denuncia e corrupción aki, sin ricibi reacción. Pesey e nomber di e deal aki mi ta yame “Acuerdo di SMOELTJE DICHT”. Ningun di esnan envolví kier bisa algo.
Tabatin mashar cosnan malo mes tabata pasando den e maneho di e banco, hasta prestamonan miyonario di famia di nos exprome ministro (1999).
E sistema conoci cu a manda hopi banco bancarota, e sistema di pirámide, sigur tambe tabata luci den e maneho di e banco. Asina tabatin hopi mas cosnan negativo. E managernan, a haci cosnan cu no por mira claridad di dia y esnan den hunta di comisariado, kendenan ta figuranan grandi den nos comunidad, no a actua.
Banco Central, cu e LTK (Landsverdening Toezicht Kredietwezen) den su man, cual instancia mester a controla , supervisa y preveni cu e maneho na Interbank a bay di malo pa peor, tampoco a cumpli cu su trabao pa supervisa e banco. E banco lo mester a bati bancarota y Banco Central mester a para responsabel pa e dañonan. Pero na 1999, Banco Central lo a pusha gobierno (partido AVP), pa cumpra Interbank pa F 1,= (un florin). E suma ey ta indica un cos fishy, hopi stinki, pues no tabata correcto.
Despues ta pase pa FCCA, cual nv-estatal no tabatin den su statutonan e parti cu e por maneha un banco. E portofolio di e banco tabata malísimo, cu un balor negativo grandisimo.
Algun aña después, awor cu MLT como ministro di MEP, algo único ta pasa.
FCCA ta bende Interbank cu un banco local y FCCA mester a fia 55 miyon florin pa entre otro paga e banco Local cual a cumpra Interbank. Pues, bo ta bende bo auto, pero ta Abo ta paga esun cu a cumpra bo auto, hopi placa. MLT tabata encarga cu FCCA y tabata e autor intelectual di e benta di Interbank na e Banco Local y bao di su maneho e Balor di Interbank a baha di “un” florin te banda di 50 pa 55 miyon florin negativo. E suma cu a paga e banco local pa cumpra Interbank no ta conoci.
Un ehempel clarito di Negoshi di cangrew, ta cumpre pa un florin y ta paga + 55 miyon florin pa bende. Pues Compra y Benta di Interbank, ta un acto grave di corrupción.
Esnan mas pober mester a paga pa scapa e riconan y esnan cu no a haci nan trabao.
Riconan a echa baina, nan a haci actonan di corrupcion, nan a horta, politiconan y Banco Central ta tuma parti pa e riconan, nan ta percura pa tur maldad ricibi un bachi legal for di politiconan na mando, cu construccionnan bunita, tur pa scapa e riconan y otronan cu no a haci nan trabao manera mester ta.
Anto e mas pobernan den nos comunidad:
1. Esnan cu no por tin nan propio cas y mester paga huurnan halto den casnan di pueblo;
2. Esnan cu no por bay un banco of pensioenfonds pa ricibi un hipoteca cu interés abao, di banda di 6%, mester keda na FCCA cu su hipoteca cu interés halto di banda di 12%;
Mester a paga e daño causa, total na pago bek entre 125 pa 150 miyon florin, pa e riconan y esnan cu no a haci nan trabao of nan a corrumpi, por drumi trankil.
Manera ta conoci den tur e dealnan scur, hopi placa lo a bay pa paga nan hendenan. Awe nos conoce e palabranan bunita “QUID PRO QUO”. Un favor pa otro favor of mi ta duna bo algo y mi ta haya algo bek. Mas bien ta conoci: Mi ta duna bo hopi y bo ta dunami hopi bek.
Ora bo pensa bon, den e caso di Interbank, bo ta puntra bo mes cu esey por ta e motibo cu esnan envolví ta boca será, Nan ta mantene nan mes na e acuerdo di “Smoeltje dicht”.
Ningún sorto di información ta Sali pa hopi aña caba.
UN PICA ta, cu ta e pobernan mester a paga miyonnan pa riconan cu a corrumpi, horta, echa baina, pa otronan cu no a haci nan trabao, pa otronan cu no a controla, por cana cara den laira.
Hopi preguntanan tin pa contesta.
Mi ta ripiti e preguntanan, na tur esnan cu sigur ta envolví.
• Prome, pakico a uza e táctica pa tur esnan envolví keda boca sera?
• Banco Central a faya barbaramente cu su supervisión, via LTK ariba Interbank of tabatin un deal pa no haci esaki?
• Si Interbank a bati bancarota, cuanto esaki lo a costa Banco Central?
• Cuanto ta e miyonnan di florin (+interés), cu famia di ex-prome-ministro y su famia a keda beneficia dor di e construccionnan di compra y benta di Interbank?
• Pregunta na esnan cu tabata envolví den FCCA, momento cu a bende Interbank, cuanto miyon FCCA mester a paga e banco local?
• Cuanto miyonnan esaki a costa FCCA pa paga prestamo bek + interés?
• Ministro di DIP MLT, durante tratamento di presupuesto 2005, a bisa cu tin un raport traha ariba compra y benta di Interbank, unda e ta?
• Pa tur esnan envolví, boso ta conciente cu ta pobernan mester a paga pa salba boso, pa e malbadonan por drumi trankil?
Ban spera cu ariba e dia internacional contra corrupción, esnan envolví lo reflexiona ariba e caso aki , pensa un rato cu ta esnan mas pober den nos comunidad mester a paga miyonnan pa scapa e malbadonan.
Y na final kibra e “smoeltje dicht”. Esaki ta un opinion publico
Finalmente
E comunicado aki ta sirbi pa concientisa pueblo di e lucha contra corrupcion y tambe ariba e importancia di e dia aki pa pone atención y encurasha e lucha contra corrupción pa mantene y logra e metanan di desarroyo sostenibel pa 2030.
Según Nacionnan uni Corrupcion ta costando mundo alrededor di 3,6 trillion di dollarnan ($3.600.000.000.000) cual ta igual na 5% di tur loke nos tur na mundo ta produci.
Corrupcion ta e menasa mas grandi pa no logra e metananan encuanto desaroyo sostenibel na 2030.
T. I. (Transparency Internacional) ta pidi mundo completo pa pone atención ariba e dia aki contra corrupción y pa mundo bira “corruption free”.