Tin un cantica cu ta bisa : Grandi ta bo fieldad, O Dios mi Tata, nunca den bo por tin cambio hamas,
tur Bo bondadnan na mi ta precioso, pa tur eternidad Bo ta mescos.
Ora nos ta canta e cantica ey for di profundidad di nos curason, sabiendo ken Dios ta pa nos, kico E a
haci pa nos, for di unda E a saca nos, di kico E a libra nos, nos wowo mester yena cu lagrima, pasobra
cada ken sa kico Dios a haci pa nan.
Tin hende cu E a libra di morto,
Tin hende cu E a libra di prison,
Tin hende cu E a sana di malesa cronico,
Tin hende cu E a saca for di gara di satanas,
Tin hende cu E a libra di depresion mental,
Tin hende cu E a libra di droga y alcohol,
Tin hende cu e a libra di inmoralidad y abominacion.
Pero hopi hende ta sconde locual Dios a haci pa nan enbes di duna tesimonio di e amor , fieldad y
grandesa di Dios.
Ora nos mira con hende ta chercha Dios, haci bofon, rechasa, purba di manipula, aproba maldad, halsa
nivel di hipocrecia, cambia e berdad di Dios pa mentira, ninga di reconoce Dios, consenti cu
maldad,ora ey esnan cu ta stima Dios, y cu ta reconoce Dios su bondad y su misericordia ta bira hopi
tristo.
Ta con tin hende ta trata Dios asina con cu ta, y ta lubida nan ta lubida ken Dios ta? Ta respet no tin, of
nan ta kere cu nan ta mas grandi cu Dios, tin hopi hende no sa cu Dios por pone hende drumi, y cu nan
no por lanta for di nan cama,( Revelacion 2:21-22) y tin hopi no tin conocemento di Romanonan 1:
28-32, kico por pasa cu hende ora cu nan no kier reconoce Dios.Ta bon pa tur hende tene cuenta locual
ta para scirbi den 2 Thesalonisensenan 1:11-12.
Den Numbernan 23:19 ta para scirbi: Dios no ta hende,cu E lo gaña, ni yiu di hende, cu E lo repenti.
Acaso E a bisa, y E lo no hacie?. Of E a papia, y E lo no cumpli?
Den Lucas 21:32-33 Hesus ta bisa: Di berdad, di berdad mi ta bisa boso, e generacion aki lo no
pasa,prome cu tur cos tuma lugar. Cielo y tera lo pasa,ma Mi palabranan lo no pasa.
E lo cubri bo cu Su plumanan,y bao di Su halanan lo bo busca refugio, Su fieldad ta un escudo y un
baluarte.( Salmo 91:4).
O Señor bo ta mi Dios,lo mi halsa Bo,lo mi duna gradicimento na Bo nomber,pasobra Bo a haci
cosnan maraviyoso, plannan forma hopi tempo pasa den fieldad perfecto.(Isaias 25:1).
Ma Señor ta fiel, Y E lo fortalese y warda boso,di e malbado. ( 2 Thesalonisenenan 3:3).
Awor cu e Dios di pas mes santifica boso completamente,y cu boso spirito y alma y curpa sea preserva
completamente,sin culpa na e binida di nos Señor Hesus Cristo. Fiel ta Esun cu ta yama boso, y E lo
haci esaki sosode tambe, ( 1 Thesalonisensenan 5:23-24).
Señor tin compasion y misericordia di nos, y aunke nos por ta infiel, Dios semper ta fiel, Su fieldad ta
di eternidad pa eternidad, E a duna su Yiu unigenito pa ken cu kere dj’E wordo salba y tin bida eterna.
Ora nos corda con grandi Su fieldad ta, a keda solamente nos por arepenti di nos picanan, y hiba un
bida den boluntad di Dios tur momento, y demostra fieldad na Dios.
Sinceramente, Pastor Marcel Balootje.