studiante di OGM a defende su tesis exitosamente na un manera virtual den presencia di e comite di graduacion.
Robert Krosendijk su investigacion a enfoca riba e tema “E sistema electoral na Aruba por medio di e wowonan di e millennials”. E pregunta general di investigacion tabata: “Con por adapta e sistema electoral na Aruba conforme cu e necesidad di e “millennial generation”?”
Pa su investigacion, Robert a acerca 194 hoben cu ta cay den e grupo di millennials. E millennials nan aki a yena un encuesta na un manera electronico. E resultado di e investigacion a mustra cu millennials na momento di deposita nan voto ta haya e mensahe y ideanan cu e politico ta trece dilanti mas importante cu e apariencia di e politico. Tambe ta notabel cu e millennials ta faborece un sistema electoral di un forma electronico, tambe a bin dilanti cu nan ta desea pa vota separadamente pa Minister y Parlamento. Por ultimo nan ta comparti e idea cu e politico cu mas voto mester representa e pueblo votador den parlamento.
Despues di un presentacion, Robert a defende su tesis den presencia di e comite di graduacion cu a consisti di drs. Judelca Briceño como supervisor di tesis, y evaluado mr. Luciano Milliard. Mr. Carlos Guiamo trahando na Departamento di Legislacion y Asunto Huridico tabata presente como miembro externo di e comite di graduacion. E comite a elogia Robert pa su investigacion relevante y su recomendacionnan duna.
Den su tempo na Universidad di Aruba, y durante e proceso di su tesis, Robert a crece na un nivel academico y personal. Universidad di Aruba, particularmente e departamento di Organization, Governance, and Management ta felicita Robert cu e logro aki y ta desea Robert tur clase di exito den su carera. Pa mas informacion tocante OGM, bishita e pagina di Universidad di Aruba na http://www.ua.aw/OGM y e pagina di Facebook https://www.facebook.com/pages/University-of-Aruba-OGM-Organization-Governance-Management-FAS/