Evert Bongers, autor di varios publicacion tocante historia di Aruba manera e.o. ‘Augustus scur’ y ‘De kolibrie op de rots: En meer over de geschiedenis van Aruba’ ta publica awor su buki titula ‘Goudkoorts! En meer over de geschiedenis van Aruba’. Directora di Biblioteca Nacional Aruba a ricibi algun ehemplar for di sr. Evert Bongers pa e coleccion nacional como tambe e coleccion di biblioteca publico. Pronto por consulta of lesa e buki aki na biblioteca.
Sr. Evert Bongers semper tabata hopi interesa den historia di Aruba y a publica hopi articulo riba su website www.historiadiaruba.aw como tambe den corantnan local. Despues cu Evert a baha cu pensioen ela profundisa su mes mucho mas pa medio di investigacion y a dedica mas tempo na studia nos historia. Esaki a resulta den diferente publicacion. Su casa Heleen ta contribui na su trabou cu coreccion y editing di texto, Heleen ta fotografo tambe. ‘Goudkoorts! En meer over de geschiedenis van Aruba’ ta mescos cu ‘De kolibrie op de rots’ un serie di articulo cu tambe a keda publica den Amigoe den pasado.
E autor a amplia cierto temanan cu a keda publica den ‘De kolibrie op de rots’ cu mas informacion. Por ehempel temanan manera pinturanan den cueba, e industria di oro, e historia di e segunda guera mundial. Pero tambe tin topiconan nobo manera e historia di Carnaval, imigracion pa Cuba y e bida na Lago Colony. Amantenan di historia di Aruba sigur sigur lo bay lesa e buki aki cu hopi placer. E buki tambe ta duna informacion di algun restaurant cu tabata popular den pasado.
Evert Bongers a sigui scol basico y secundario na Aruba y despues a sigui studia Frances na Hulanda. Na augustus 1977 Evert y su casa Heleen Bongers a regresa Aruba. Te cu 2005 Evert a traha como docente Frances na Colegio Arubano y despues como decaan te 2018. Evert Bongers ta dedica e buki aki na su tata, Huibregt Pieter (Huib) Bongers. Esaki ta obtenibel na libreria.
