Ministerio di Enseñansa, Siensia, Kultura i Deporte (ESKD) a reflehá riba dia di Enseñansa di forma virtual ku e sektor di Enseñansa. Durante di e aktividat, Minister di ESKD sr. Steven Croes a hiba palabra felisitando e sektor riba nan dia. Tambe oradornan di órden manera sikólogo sra. Ijolene Constancia, presidente di SITEK sr. Darius (Lio) Plantijn, representante di direktivanan di skol sra. Marilyn Overman, eksperto di Idioma sra. Christine Jerdingan i Dòkter Melissa Arias a hiba palabra i para ketu na e tema di e mainta ku ta Bienestar den tempu di COVID-19.
E mainta a keda habrí pa direktor di Sektor di Enseñansa i Siensia sr. Wladimir Kleinmoedig, kende a yama nos sektor di Enseñansa pabien i alabes a yama Minister Croes bon biní komo minister den e sektor. Na mes momentu a sa di para ketu na e balansa ku nos mester tin huntu den enseñansa pa por sigui traha na bienestar di nos muchanan. Sr. Darius (Lio) Plantijn a felisitá e sektor i a para ketu reflekshonando riba e hecho ku komo organisashon Sitek a kumpli 47 aña awe. Ela dialogá for di e perspektiva di esfuerso teniendo kuenta ku e tópiko i a elaborá riba esaki kaminda kada hende mester hasi na máksimo pa logra bienestar kompletu. Sra. Marilyn Overman a hiba palabra na nòmber di tur e direktivanan di skol i a elaborá tambe riba e tema saliendo for di e perspektiva di komprenshon pa e edukadó.
Minister di ESKD sr. Steven Croes a hiba palabra i a indiká ku e trahadó di enseñansa mester traha den un ambiente trankil, seif i agradabel. P’esei e ta fokùs riba e ambiente pa esaki por ta moderno, agradabel, seif i na òrdu, ya ku e ambiente na skol ta parti integral di bienestar. Dokter sra. M. Arias a elaborá riba e balansa ku nos mester tin pa por funshoná optimal den e tempunan difísil. Sikólogo sra. I. Constancia a para ketu na e manera kon pa ekipá nos mes pa manehá stress den pandemia. Eksperto den Idioma sra. Christine Jernigan a elaborá riba un investigashon hasí na Kòrsou pa ku e tema “Free-to-the public Immersion English School Curaçao”.
