Gobièrnu mester duna klaridat: Kiko ta berdat den eskoho di operador pa refineria

A pidi reunion di parlamento pa haña klaridat

Resientemente Frakshon di MAN a tuma nota di kontenido di un karta ku representante di Grupo GIK, kual ta un di e interesadonan pa operashon di nos refineria a manda pa ministernan di Gabinete Pisas ku kopia pa miembronan di Parlamentu di Kòrsou.  

E kontenido di e karta ta akusá 2 minister di Gabinete Pisas, kual ta minister Presidente Pisas i Minister Cooper di a influensia e proseso di ta forma ku GIK no a keda skohé komo “preffered bider”. 

E parti di e karta ku nos ta sita kaminda e akusashonnan  ta bini dilanti. 

Karta di Grupo GIK na Konseho di Minister – 22 di febrüari 2023

Esaki sigur ta un akusashon fuerte kontra gobièrnu i ta tacha integridat di e proseso pa eskoho di un operador pa refineria. Pa nos operashon di refineria ta di gran importansia, kaminda ta eksigí profeshonalismo, integridat i sinseridat di parti Gobièrnu. 

Komo representante di pueblo nos no por sinta ketu, mira i aseptá ku akusashonnan asina ta bini dilanti i di e forma aki tacha e proseso, pero tambe kara i integridat di gobernashon di nos pais. 

Pa e motibu aki Frakshon di MAN ku sosten di Frakshon Trabou pa Korsou, Frakshon di PAR i Frakshon di KEM a hasi petishon pa un Reunion Públiko di Parlamento ku karakter di urgensia. Pa e reunion Públiko a pidi presensia di Minister Presidente i Asuntunan General sr. Gilmar Pisas.  

Nos ta hasi un supliká na Presidente di Parlamento pa mas pronto posibel pa konvoká e reunion pa di e forma aki Parlamento i pueblo di Kòrsou por haña informashon konkreto i korekto riba e proseso di refineria ku a keda hibá, i ku a kulminá den eskoho di CPR komo “preferred bidder”.  E akusashon nan ku grupo GIK ta bini kun’e ta serio i no por laga esaki pasa bai òf boltu blachi i sigui.