Diskurso di Gezaghèber Edison Rijna na okashon di un enkuentro tokante reakshon di gobièrnu hulandes riba e rapòrt di konseho ‘Kadena di pasado’, Mangazina di Rei, Rincon, 19 di desèmber 2022
Minister Van Gennip, apresiabel miembronan di Konseho Insular, diputadonan, otro presentenan i tambe tur ku ta sigui nos via e diferente medionan di komunikashon, bon dia.
Awe nos ta huntu pa motibu di un suseso spesial. E dia di awe ta bai den buki di historia komo e dia ku gobièrnu hulandes ofisialmente ta pidi diskulpa pa e ròl di estado hulandes den pasado di sklabitut. Nos tur a kaba mira e diskurso di minister presidente na Archivo Nashonal na Den Haag i mi ke gradesí spesialmente minister Van Gennip ku el a bini Boneiru pa personalmente trese e mensahe di diskulpa aki na nòmber di gobièrnu hulandes.
Sklabitut a laga marka profundo atras na nos isla. Marka visibel, marka invisibel i ainda tur dia notabel. Pa generashonnan largu, hende ku nan a hasi katibu no tabatin perspektiva pa un futuro liber. Tòg nan a purba, kaminda tabata posibel, duna nan bida forma. Por ehèmpel hasiendo músika huntu i kanta kantika den kua nan por a ekspresá nan sintimentu tokante nan eksistensia. Barí – òf tambú manera nan ta yam’é na nos hermana isla Kòrsou – ta un ehèmpel di esaki. Barí ta tantu un género musikal komo un baile. Tabata usa solamente dos instrumento, e barí òf tambú i chapi, esaki kompañá ku batimentu di man i batimentu di hilchi di pia. Mayoria biaha hende muhé tabata pèrkurá pa kanto. Barí a desaroyá na e plantashinan kaminda katibu tabata traha. Teksto di e kantikanan tabata un lenguahe sekreto, di manera ku e katibunan por a komuniká ku otro tokante asuntu ku Shon, doño di plantashi, no tabatin mag di sa. Dòbel sentido ta un karakterístika importante di barí. Te ainda rònt di kambio di aña ta kanta den barí susesonan di e aña ku a pasa. Esun ku ta skucha mester paga bon tinu kiko ta e nifikashon real tras di e palabranan.
E diskulpa di gobièrnu hulandes awe ta leu for di dòbel sentido. Personalmente mi ta mira esaki komo un punto di salida pa enfrentá un periodo skur den nos historia komun. Nos mester duna e momentu spesial akí atenshon i tambe kontinuashon. Gobièrnu di Boneiru ta bai prepará un reakshon ofisial pa Den Haag.
Nos representantenan di pueblo ta bai den debate ku otro i nan lo prepará un reakshon apropiá. Ta inkluí den esaki konseho di entre otro Grupo di Diálogo Boneiru i otro ekspertonan riba tereno di pasado di sklabitut.
Grupo di Diálogo Boneiru a sali for di e aktividatnan di Hunta di Konseho Grupo di Diálogo Pasado di Sklabitut, ku ministerio di Asuntunan Interno i Relashon ku Reino a instituí dia 1 di yüli 2020. Meta tabata pa organisá un diálogo sosial amplio tokante pasado di sklabitut hulandes i influensia di esei riba nos komunidat di awendia. Tur seis isla di e parti karibense di Reino a forma un propio grupo di diálogo ku representantenan for di nan komunidat. Na Boneiru a hiba kòmbersashon ku entre otro habitantenan i organisashonnan sosial pa sondia i diskutí ampliamente opinion i sintimentu tokante pasado di sklabitut, i tradusí esakinan den un konseho. E tempu ei a presentá e konseho aki na Konseho Insular i a inkluí esaki den e Rapòrt di Konseho ‘Kadena di pasado’ di e Hunta di Konseho ku na 2021 minister di Asuntunan Interno i Relashon ku Reino a ofresé na Tweede Kamer na Hulanda.
Manera minister Van Gennip a sita, bonerianonan ku a kontribuí ku e grupo di diálogo no ta spera èksküs di Hulanda. Pa nan otro aspektonan di hustisia i pa egersé hustisia, ta muchu mas importante: bonerianonan ku a kontribuí ku e grupo di diálogo ta pordoná i ke rekonsiliashon ku hulanda. Akí ta duna hopi balor na ‘igualdat’ i ‘oportunidat igual pa desaroyo’. Esaki ta nifiká ku tur hende den Reino Hulandes, tambe na Boneiru, mester haña e oportunidat pa desaroyá nan talentonan i mester por invertí den un bon futuro.
Boneiru a skohe na 10-10-2010 pa bira parti di Hulanda. For di e fecha ei nos a sigui komo ‘munisipio spesial’. Esaki a trese kos bon pa nos den sentido di invershon di gobièrnu di Reino den entre otro mihó enseñansa, mihó kuido di salú i oumento di kalidat di otro benefisionan komun. Eliminashon di retraso sosial tambe tin atenshon, pero no ta tur boneriano a bai dilanti. Esei nos ta tende i mira diariamente.
E gesto ku gobièrnu hulandes ta hasi awe, ta nifiká algu distinto pa tur hende. Pa algun hende esaki ta un paso nesesario pa mehorá relashon, pa otronan ta trata di asuntunan mas konkreto.
Den konseho di e grupo di diálogo nan ta pidi entre otro pa pone un fin na trato burokrátiko i muchu riba un distansia i tin biaha hasta ku deskonfiansa pa preokupashonnan ku ta biba na Boneiru. Desaroyo di konosementu na ministerionan na Hulanda di historia di Boneiru por kontribuí na esaki. Tin nesesidat pa un programa ku kua por superá den sentido amplio retrasonan na Boneiru. Ku konosementu di pasado i ku bista pa realidat lokal. Asuntunan manera desaroyo di papiamentu, oumento di konosementu di historia propio i atenshon pa nos patrimonio kultural, ta di gran importansia pa esaki. Lo mi ke menshoná akí tambe ‘Grupo di trabou 1 di yüli’ ku Kolegio Ehekutivo a instituí i último tempu a hasi hopi trabou pa amplia konsiensia tokante pasado di sklabitut na Boneiru. Asina nan a organisá entre otro kaminata históriko, un kompetensia di poesia pa skol básiko, charla i anochi ku sine.
Laga pasado siña nos lès pa futuro. Laga nos komo ‘Komunidat’ i no den ‘Soledat’ sigui duna forma na nos isla. Pa hasi esaki, un relashon di igualdat ku Hulanda ta di gran importansia.
Despues di e programa ofisial akí, vários representante di partidonan ku ta okupá nan mes ku pasado di sklabitut bou di guia di presidente Sr. Nolly Oleana ta bai den kòmbersashon ku minister Van Gennip i represenante di Reino tokante kontinuashon i elaborashon di e rapòrt di konseho. E echo ku awor públikamente nos por diskutí e tópiko kargá akí ku otro, mi ta mira komo algu grandi.
Finalmente mi ke invitá boso pa awor ban mira i skucha un programa kultural ku ta hiba nos na nos pasado komun i nos futuro.
Pa siglonan i mundialmente, músika ta un manera pa ekspresá sintimentu i pa transmití storianan di bida. Músika ta uni nos tur.
Mashá danki.
