Kolegio Ehekutivo a forma un grupo (taskforce) ku ta okupá ku e tarea di hürmentu di kas pa un periodo kòrtiku den barionan kaminda esaki no ta permití. Gobièrnu di Boneiru ta bai kontrolá esaki mas severo den e periodo ku ta bini.
Tin un nesesidat grandi pa bibienda pagabel riba Boneiru. Preisnan pa hür i kumprá kas a subi enorme den último añanan. E situashon aki tin Kolegio Ehekutivo preokupá. P’esei Kolegio Ehekutivo ta bai tuma diferente medida pa pone mas kas pagabel disponibel pa siudadanonan.
Un di e medidanan pa baha e preisnan riba e merkado di bibienda ta pa stòp hürmentu di kas pa término kòrtiku ku turistanan. Den mayoria bario na Boneiru no ta permití pa hür kas pa un término kòrtiku. E barionan kaminda esaki ta permití ta fihá den e Ruimte- en Ontwikkelingsplan Bonaire (ROB). Solamente e barionan ku tin e deskripshon ‘Recreatie-Verblijfsrecreatie’ òf ‘Gemengd-1’, ‘Gemengd-VI’ i ‘Gemengd-Uit te werken I’ ta permití pa hür bibienda y apartamentonan ménos ku 3 luna. Den tur otro áreanan esaki no ta permití.
E motibu pa permití hürmentu di kas ku turista solamente den sierto áreanan ta paso Gobièrnu ta aspirá pa tin barionan kaminda ta forma un komunidat uní, ku hendenan ku ta biba einan pa un periodo largu. Kaminda bisiñanan konosé otro, muchanan por forma amistat y bisiñanan ta yuda otro.
Hürmentu di kas pa un periodo kòrtiku ta produsí mas entrada ku hürmentu pa un periodo largu. Esaki ta pone ku ta bira mas difísil pa habitante di Boneiru mes hür un kas. Ménos kas ta keda disponibel y preisnan di hür ta mas haltu.
Estudio a demonstrá ku turistanan ku keda na un hotèl òf resort ta saka mas sèn. Esaki ta kontribuí na mas trabou paso hoteleria y resorts ta duna mas servisio na bishitantenan.
Pa atendé ku e problemátika aki a forma un taskforce, ku den e periodo binidero ta bai aktua kontra hürmentu di kas pa periodo kòrtiku. Ya kaba a manda karta pa doñonan di kas den sierto bario ku ta hür nan kas pa un periodo kòrtiku.
Makelarnan y notarionan a keda informá tokante e maneho, ku e petishon pa konsehá nan klientenan.
Lenk pa e Ruimtelijk Ontwikkelingsplan Bonaire: https://rho.maps.arcgis.com/apps/webappviewer/index.html?id=6cc4a2397de445e9849b6de08614134d
Den e mapa tin e diferente áreanan den diferente koló. Por oumentá e mapa. Ora klèk riba un área, e deskripshon di e área ta bira mas visibel. Ora un área tin e deskripshon di ‘Recreatie-Verblijfsrecreatie’ òf ‘Gemengd-1’, ‘Gemengd-VI’ i ‘Gemengd-Uit te werken I’ tin mag di hür kas na un periodo kòrtiku. Den otro áreanan esaki no ta permití.
Solamente e barionan ku tin e deskripshon ‘‘Recreatie-Verblijfsrecreatie’ òf ‘Gemengd-1’, ‘Gemengd-VI’ i ‘Gemengd-Uit te werken I’ ta permití pa hür bibienda y apartamentonan ménos ku 3 luna. Den tur otro áreanan esaki no ta permití.