Gobièrnu di Hulanda a aprobá pa pone 5.5 miyon dòler pa Karibe Hulandes ku e meta pa aliviá e oumentu di preis di koriente. Asina Konseho di Minister di Hulanda a informá djabièrne pasá pa medio di un komunikado. “Nos ta sumamente kontentu ku e notisia aki,” diputado Thielman enkargá ku asuntonan ekonómiko i energía a deklará. “Esaki ta resultado di e maneho proaktivo di gobièrnu di Boneiru unda ku a aserká gobièrnu Hulandes pa inkluí Boneiru den e plan pa mitigá oumento di kosto di energía pa asina sostené poder di kompra.”
Kon e kompensashon lo tuma lugá, mester wòrdu elaborá ainda. Esaki lo sosodé den konsulta ku mandatarionan di Boneiru, Saba i St. Eustatius. Aktualmente Kolegio Ehekutivo di Boneiru ta den diálogo kaba pa konkretisá esaki. E proposishon ta pa un parti di e suma wòrdu aloká pa mitigá posibel subida di e tarifa di koriente. Alabes, Kolegio Ehekutivo ta haña importante pa redusí aksèins riba gasolin, lokual sigur lo trese un alivio pa tur konsumidó Boneriano.
“Sosten i finalmente mehorashon di poder di kompra pa e siudadano Boneriano ta e meta prinsipal di Gobierno. Pa motibu di e desaroyonan mundial nos mester tene kuenta ku preisnan lo subi tambe na Boneiru. Ku e alokashon aki nos ta dal un stap konkreto pa yuda e hendenan di Boneiru,” Diputado Nina den Heyer ta splika. Gobièrnu Hulandes ta tuma e medida aki pa mitigá pèrdida di poder di kompra, prinsipalmente pasobra preisnan di energía a subi drástikamente komo un efekto di guera na Ukraína.
Komo ku Boneiru tin un ekonomía habrí, lamentablemente no por skapa di e efektonan eksterno aki. E preis di e komustibel ku ta yega Boneiru ta fluktuá ku e preisnan riba merkado internashonal. Sinembargo, Kolegio Ehekutivo ta hasi tur esfuerso pa mitigá e efektonan riba poder di kompra unda ku por.
