Ta bini un Bonaire Sabal Palm Park pa protehá e Palma di Kabana. E parke ta un inisiativa di e organisashonnan Bon Bèrdè, Montgomery Botanical Center, Seacology i Gobièrnu di Boneiru.
E “Sabal Palm” òf Palma di Kabana di Boneiru ta úniko den su sorto. Tin aktual 24 palma madurá na Boneiru, pero tiki tiki esaki tambe ta birando ménos. Esaki debí na sekura i pasó kabritu i buriku ta kome e palunan hóben. P’esei e palmanan nobo no por krese i bira grandi. Pa por protehá e tiki palunan ku a sobra mester trese protekshon pa nan di un forma inmediato.
Pa skapa e tipo di palmanan aki for di kaba na nada, a diseñá un plan ku no solamente ta protehá e palma úniko aki, pero ku ta pone atenshon tambe riba e área kaminda nan ta krese pa desaroyá esaki na un manera sostenibel pa e sektor di eko-turismo. Segun Diputado Thielman, e vishon di Parke di Sabal ta den e mesun liñanan ku Bonaire Blue Destination i e plan di rekuperashon di turismo kaminda ke trese desaroyo balansá teniendo kuenta ku nos kultura i nos naturalesa.
Ta sera e área kaminda e palmanan aki ta krese den kurá pa tene buriku i kabritu pafó. Esaki ta duna e posibilidat pa por planta mas di e palmanan aki i asina rekuperá e poblashon di Palma di Kabana. Lo kuminsá ku un trayekto edukativo pa mucha i turista. Ta bai hasi mas estudio tokante kresementu di e palmanan. E idea ta tambe pa monitoriá i kultivá e tipo di palma aki pa por garantisá nan eksistensia.
“Akseso na e parke ta liber i ta bai krea ruta pa kana i kore baiskel i pone baki di sushi i foyeto di informashon. E parke di Sabal ta brinda e oportunidat uniko pa eduká, distraí i protehá”, segun diputado Kroon. E Parke di Sabal ta situá kantu di e kaminda pa bai Sorobon i ta den un área destiná pa naturalesa den e Plan di Desaroyo Espasial Boneiru (Ruimtelijk Ontwikkelingsplan Boneire – ROB). Esaki ta hasié un desaroyo ideal pa elevá e produkto turístiko di nos isla.
1 comment