KRALENDIJK, Bonaire
Gobièrnu di Boneiru a kuminsá limpia posnan ku mulina pa asina trese alivio pa e kunukeronan mirando ku e posnan ku tempu ta duna ménos i ménos awa pasobra nan ta yena ku sushi i tera. Diputado James Kroon kende ta enkargá ku Agrikultura, Krio di Bestia i Peska resientemente a skucha algun kunukero ku a trese nan preokupashon dilanti relashoná ku e awa ku ta basha for di sierto posnan i e kantidat di awa ku sierto kontratistanan ta kue pa usa pa nan konstrukshon. Diputado Kroon huntu ku direktor di LVV sr. Maurice Adriaens a yega na e desishon pa laga limpia e pos na Bará di Karta.
Diputado Kroon huntu ku sr. Adriaens a bai pone nan mes na altura di e trabounan ku e kompania enkargá ku e limpiesa Elite and Quality Services di e dama Nela Martis a ehekutá na e pos. E shushinan ku e kompania aki a logra saka for di fòndu di Pos Bará di Karta ta konsistí di un kantidat i palu, pipa, piedra i diferente otro tipo di shushi. E mènedjer di Elite and Quality Services sr. Simon Quant a duna diputado Kroon i sr. Adriaens informashon tokante tur loke nan a hasi pa limpia e pos. Sr. Adriaens a duna di konosé ku na e momentunan aki ta bai evaluá pa wak kua otro pos ta bin na remarke pa haña su limpiesa.
Diputado Kroon a trese dilanti ku gobièrnu ta sumamente satisfecho ku e trabounan ku sr. Adriaens i su tim ta hasi pa nos kunukeronan últimamente. E diputado ta hasi un yamada na tur esnan ku ta bishitá nos posnan pa por fabor no bai ku e kabesnan di kranchi, pasobra esaki ta perhudiká e kunukeronan.
Finalmente diputado Kroon ta pone énfasis ku e awa di pos pa lei solamente por ser usa dor di kunukeronan i sigur no dor di kontratista.