Ta nos compromiso pa laga un miho mundo, y un miho calidad di bida pa nos futuro generacionnan.
Prome minister Evelyn Wever-Croes den compania di coleganan ministers, alumnonan di Educampus y representantenan di e comision di “Sustainable Development Goals” (SDG), a hisa e bandera di sdg, pa conmemora cu dia 25 di September 2015, 193 pais cu ta miembro di Nacionnan Uni, a adopta e agenda di 2030 y a defini e 17 Metanan Mundial pa crea un miho mundo.
Prome minister a indica cu gobierno di Aruba, ta comprometi cu cumplimento di e metanan, y pesey ta honra e tradicion di hisa e bandera di SDG riba e dia special aki. Como invitado special, tabata presente e alumnonan di Educampus, cu ta hobennan cu ta pone nos corda e importancia y bienestar di un y tur cu ta biba riba nos dushi pais Aruba, y cu nos como mayornan y gobierno no tin cu solamente cu tuma decisionann pa nan, sino pensa y tuma decisionnan hunto cu nan. “E ta nos compromiso pa laga un miho mundo, y un miho calidad di bida pa nan.
Tambe Prome Minister a splica cu e emblemanan tin colornan colorido, y ta mustra complica, pero cu mester mire manera un compas of un “to do list” na unda cu miyones di hende rond mundo ta duna nan aporte na dje tur dia. E meta final ta pa logra cumpli cu e metanan aki, pa asina tur persona riba nos planeta por goza di un miho calidad di bida, na unda ningun hende ta wordo laga atras den e desaroyo di nan pais.
Ta importante pa menciona cu ta siman pasa durante mi bishita na Nacionnan Uni, Gobierno, organizacionnan no-gubernamental y companianan priva a bini hunto pa reflexiona y analiza unda e mundo ta para aworaki, y con por acelera e proceso di implementacion di e metanan pa alcanza e desaroyo sostenibel desea. Loke si a wordo subraya durante e reunionan ta, cu esaki no ta un trabou solamente di gobierno, sino di cada cuidadano, organizacion, y compania pa duna di nan parti pa crea un miho futuro pa tur.
E Metanan pa Desaroyo Sustenible (SDG) ta un sistema cu ta subraya e importancia di balornan fuerte y implementa derechonan humano, y ta encurasha pa cada ken haci e bon pa asina nos por yega na e miho futuro. Esaki no ta facil tur ora, pero como gobierno mi por bisa cu mi ta wak e metanan mundial aki manera un agenda fuerte na unda nos por siña di otro, incluso di otro paisnan, cu lo duna nos e hermentnan necesario pa enfrenta e desafionan di manera informa y na un forma positivo. Nos tin 7 aña mas pa cumpli cu e metanan aki, Aruba ta riba bon caminda. Pesey mi kier invita comunidad completo pa nos uni y pone tur di nos banda pa nos logra e metanan aki, creando un mihor mundo pa nos futuro generacionnan. Un danki na tur esnan cu ta y a bin ta trahando duro pa nos sigui enfoca riba e 17 metanan aki” Prome Minister a expresa.
