Pa un Pais por logra metanan pa su pueblo e unico manera ta pa uni, pesey mes e yamada ta bay pa unifica e pueblo aki, pa gobierno oposicion y gremio no comunica cu otro via di prensa, no comunica cu otro via di ruedanan di prensa pa mira kende nan por papia mas duro, ken por lanta e voz mas fuerte, ken ta mas sabi cu e otro.
Mientras cu tur e partinan aki ta tumando luga na e momentonan aki den Tweede Kamer na Hulanda nan a duna nos 30 miyon florin adicional cu mester wordo paga pa aña. No ta door di gremio, no door di oposicion, no door di coalicion cu ta sostene e gobierno, pero e pueblo di Aruba cu tin cu bay paga 30 miyon florin adicional na interes paso no a yega ainda na un acuerdo. E decision den e parti aki a cay y Hulanda a tuma paso un biaha mas pa Aruba.
Mirando e proceso aki Aruba ta sigui bringa nan mes unda cu ta keda bringa di kende ta mas sabi cu otro. Si ta oposicion, si ta coalicion, si ta gremio of ta stop y bay uza e porta cu a laga habri chikito.
Segun ex minister Otmar Oduber staatsecretaris Alexandra van Huffelen tabata duidelijk y a bisa si logra yega na un acuerdo y tin ainda un negociacion ta dispuesto pa papia ariba e interes cu awe ta un interes cu ta costa Aruba desde prome di september Pais Aruba 30 miyon adicional riba nos cabes pa bay paga.
Ex minister Otmar Oduber ta haci un yamada na tur politico, na prome minister di Pais Aruba, awo ta e momento pa unifica e Pais aki. E prome stap ta, pa yama tur hende na mesa y esun cu no kier bin pueblo lo huzganan, pero prome minister di Aruba tin e rol di yama sr. Mike Eman, sr Mansur, Sra.Tromp, esunnan den coalicion, tambe e gremionan y partidonan politico pafo di parlamento.
Ta spera cu e invitacion por sali mas lihe cu ta posibel pa tur hende y pa pueblo di Aruba mira kende ta duna di su parti pa sinta na mesa y para tras di e causa, aki no ta cuestion di trompica Evelyn Wever Croes, aki no ta cuestion di elogia Mike Eman, cu sr.Mansur tin rason of gremionan tin rason, pero aki ta cuestion di uni paso Hulanda a tuma su decision caba. Mirando cu Hulanda a tuma su decision a keda na Aruba pa mira con lo bay atende cu e situacion aki.
Den pasado a busca un vak minister, pero cu tampoco no tabatin e curashi e tempo ey pa a bin cu e BTW cu mester a bin y tambe un cantidad di compromisonan cu mester a bin cu a wordo cera cu Hulanda unda cu tabatin witte donderdag, zwarte vrijdag, y tur e acuerdonan cu a wordo firma.
Tambe ta corda cu e minister di finansas e tempo ey a bay te na Hulanda unda cu a entrega su retiro for di Hulanda paso e lo a kere cu lo e por a logra atrabes di e portanan di patras, den e caso aki cu Hulanda e no a logra.
Segun Ex minister Otmar Oduber te na e momentonan aki di e gobierno cu su mes a forma parti di dje, unda cu a bandona e gobierno e tempo ey como minister di AVP, unda cu a bay gobernador y den un di e 7 argumentonan bisando cu e forma cu ta atende cu e finansa publico di nos Pais nos no por continua cu ne. Di e manera aki a dicidi di bandona AVP mirando e mal maneho cu nan tabata hibando cu finansas publico di Aruba.
Esaki tabata un punto cu e trece padilanti for di aña 2016, awe nos ta 7 pa 8 aña mas leu y un gobierno cu ta sinta awe cu tampoco ta cumpli cu acuerdonan cu tin cu Hulanda y esaki tin Aruba den e situacion caminda nos ta awe. Si berdaderamente Aruba kier gana respet di reino Hulandes y aunke nos sa cu Hulanda ta campeon den schaak, cual ta un di e rasonan cu Aruba a scoge pa status aparte y a scoge pa nos tin nos propio gobierno, nos mes placa y nos propio banco central, pero na mes momento nos sa tambe cu durante añanan a faya Hulanda riba acuerdo nan unda cu Aruba mester a cumpli pa tin e respet di Hulanda.
