Ultimamente ora bo pasa den e cayanan na Aruba ta manera ta na Havana bo ta. Durante 6 aña di gobernacion no a mantene edificionan di gobierno ni a mantene nos careteranan. Prome cu eleccion di 2021 gobierno a asfalta camindanan di santo cual sigur ta un bon obra pa e pagadornan di belasting como tambe pa e habitantenan cu tabata sufri di molester di stof. Nos por mira e caretera den Columbusstraat y e caminda na Palm Beach te ainda ta cera. Un projecto morocoi cu no tin fin di keda cla. Nos caya grandi ta morto pero “who cares”.
Nos por a tende cu dia 6 di september 2023 trahadornan di DAO y DIMAS a walk out pa motibo cu e edificio tin schimmel. Nos por corda e historia di Wilhelminastraat 40 caminda polisnan mester a traha den un edificio inhumano. E deterioro di un edificio no ta cuminsa di un dia pa otro sino ta hiba tempo y pa motibo di falta di mantencion. Na 2012 polisnan walk out y a wordo menasa pa reanuda nan trabao. Un rapport riba estado di edificio di Wilhelminastraat 40 a wordo traha y a keda scondi pa 10 aña. E rapport kenmerk 13-013, datum 1 februari 2013, thema Risico Inventaris en Evaluatie, a wordo manda pa Minister di Husticia & Educacion drs.mr. A Dowers, pero e contenido a keda scondi pa 10 aña largo. E pregunta ta keda si ex minister Dowers a haya e rapport aki y sa su contenido y mande na su turno pa alto commissario di polis?
E rapport ta papia di un condicion di trabao cu no ta saludabel of sigur y cu por ta dañino of peligroso pa salud di e trahador. Por papia di un Sick Building Syndrome e ora? E tristo di henter e asunto ta cu gobierno no a interesa den salud di su trahadornan. Articulo 1614X lid 1 y 2 di nos Codigo Civil ta bisa cu e dunador di trabao ta obliga pa e lugar cu bo ta traha aden mester ta den bon estado y cu e dunador di trabou ta responsabel pa e daño cu e trahador haya durante cu e ta cumpli cu su funcion. Mesun cos a pasa cu e warda di polis den Wilhelminastraat 33 caminda cu e lugar ta yena cu schimmel. Polisnan mester a walk out pone pression riba gobierno pa logra haya un edificio cu ta den un estado faborabel pa salud di e trahadornan.
Nos por corda cu differente polis a bira malo y tin hasta cu a fayece. Awe ainda tin polis cu ta malo. E tristo ta cu polis Yearwood cu a bira malo y pasa 12 ora den camber di operacion y te dia di awe ainda gobierno no por drecha su posicion huridico. Asina nos gobierno ta maltrata su trahadornan. Cierto trahadornan cu nunca a hasi nada pero cu ta bon cu gobierno si ta haya nan promocion sin ningun problema. Awe cu e empleadonan publico ta demotiva pa via di e trato cu nan ta haya di gobierno y no papia mes di e persecucion politico. E maltrato aki tin cu nos profesionalnan ta bandona nos isla pa un mihor mayan. Esaki ta demostra cu nos tin un gobierno comunista. Hende ta kere cu por hunga cu Dios y nada no ta pasa. Husticia di Dios tey caba. Maldad no ta reina pa semper. Unico alternative ta partido Curpa.Lider di partido Curpa Eric Ras
