ORANJESTAD,Aruba
Parlamentario Endy Croes a splika cu Gobierno despues di un proceso largo a pone e bala cuminsa lora. Desde april 2020 Gobierno a acudi na Parlamento na unda durante un reunion publico a traha un ley cu a apodera Minister Presidente Evelyb Wever Croes, Minister di Finansas Xiomara Maduro y Minister di Infrastructura Marisol Lopez Tromp pa por a firma e “Termination Agreement”cu CITGO pa finalmente Aruba haña e jabi y por cuminsa un proceso limpi y nobo pa negosha cu cualkier interesado.
Dialuna 8 di Juni e crusada nobo a inicia:
Gobierno a anucia cu a inicia e proceso pa busca un operador nobo pa refeneria of sea un inversionista cu ta willing pa hasi un otro inversion riba e tereno di refineria. Dialuna 8 di juni e notificasion aki a wordo hasi publicamente tanto lokal y internacional. Lo bay encamina un proceso transparente y digno enbuska di un mihor solucion posibel na bienestar general di pais Aruba.
(2) Request for Expression of Interest ( REOI) a keda publica:
Con gobierno lo bay encamina e proceso aki? Gobierno di Aruba hunto cu RDA a publica (2) Request for Expression of Interest esta REOI 1 y REOI 2. Mediante e forma aki lo buska e manera pa atrae na un manera transparente inversionista.
Request for Expression of Interest 1 ta como lo siguiente:
Den e Request of Expression of Interest number 1 ta pidi tur interesadonan pa expresa nan interes den reapertura di refineria of cualkier otro industria relaciona cu refineria y energia por ehempel LNG plant, otro tipo di plantanan manera petro chemico of un of otro tipo di upgrader pa menciona algun.
Request for Expression of Interest 2 ta como lo siguiente:
Den e Request of Expression of Interest number 2 ta solicita na interesadonan pa expresa nan interes den cualkier otro tipo di desaroyo cu por ta util ariba e tereno di refineria aki.
Condicionnan pa interesadonan cu kier expresa interes:
Importante pa tur companianan of multi nacionals cu tin intension pa expresa un of otro interes ta na altura adelanta di e reglanan di wega y exigencianan establesi. Cualkier actividad nobo mester genera hopi cuponan di trabou y mester conta cu un desaroyo significante. E actividad mester cumpli cu reglanan di medio ambiente y e actividad mester cumpli cu e maneho di Reino riba tereno di relacion exterior y e maneho di OFAC esta ( Office of Foreign Assets Control). Esakinan ta di vital importancia.
/// Con por aplica pa pa mustra interes: Na tur companianan, investorsnan, multi nationals por download e formulario na www.government.aw y riba e site aki lo haña demas informacion y instruccion. Pues tur interesadonan tin 6 siman desde 8 di Juni 2020 cu esaki a keda publica lokal y internacional te cu e fecha di 17 di Juli 2020. Desde 17 di Juli lo continua cu 4 siman pa evalua cada interes ( idea) cu a keda expresa y dia 14 di Augustus 2020 lo anucia e resultado. Lo tin un comision cu conseheronan cu diferente experticio kendenan lo ta encarga cu e proceso aki y ta resorta directamente bou di Minister Presidente di pais Aruba. E bala a cuminsa lora y ohala cu den poko luna lo tin ideanan noble y sostenible pa crea e segundo pilar economico banda di turismo pa Aruba y asina cumpli cu un parti hopi importante pa bienestar di nos pueblo