A entrega denuncia contra cinco (ex) gobernante relaciona cu nan rol den e famoso “Kinderopvangtoeslagaffaire”. Abogado Vasco Groeneveld ta esun cu a haci denuncia contra e personanan aki cu, segun e ta bisa, a haci nan mes culpabel na “ambtsmisdrijf” y negligencia. E abogado ta papia den nomber di binti persona cu tabata victima.
E denuncia ta haci contra ministernan Van Ark (Cuido Medico), Hoekstra (Finansa) y Wiebes (Asuntonan Economico) y contra ex secretarionan di estado Snel (Finansa) y ex minister Asscher di Asuntonan Social y Trabou.
A haci e denuncia na Procurador General di Hoge Raad como cu ta trata mandatarionan of ex mandatarionan.
Nada di fair play
Segun Groeneveld, e mandatarionan tabata na altura di e iregularidadnan of por tabata sa esey. Siguientemente door cu no a interveni, gran parti di e culpa por cay riba nan.
Masha hopi mayor a haya nan mes den problema den e escandalo di “kinderopvang toeslag”, unda inhustamente a acusa nan di fraude, mester paga toeslag bek y ta haya boet. Tin biaha e sumanan ta yega te na algun dies mil euro.
Groeneveld a papia cu no a cumpli cu algun principio di Bon Gobernacion. No tabatin “fair play”, unda gobierno no tabata cauteloso y e cadena di erornan den gobierno a sigui for di mandatario pa e departamentonan, manera di Belasting, cu discriminacion, y violacion di articulo 1 di Constitucion (cu ta bisa cu tur Hulandes ta igual) y tratado internacional di derecho di mucha.
Siman pasa Ministerio Publico a anuncia cu lo no cuminsa un investigacion penal den e rol di Belastingdienst y su funcionarionan den e “toeslagaffaire”. Pero seis mayor cu a bira victima kier pa presiona OM pa haci e investigacion. Esaki tambe ta un caso cu e mesun abogado Groeneveldt ta atende.
Luna pasa caba un comision di investigacion di Tweede Kamer a conclui cu a comete un inhusticia no reconoci contra e mayornan perhudica. Den ehecucion di e “kinderopvangtoeslag” aki a viola principionan basico di un estado di derecho.
E siman aki Gabinete Rutte lo reuni riba e eventual consecuencianan politico di e rapport ey. Aunke cu Prome Rutte ta bisa cu retiro no ta un opcion logico, pasobra e lo duna esaki un balor simbolico hopi halto. Diabierna ultimo a dicidi cu ta tene un conseho di minister extraordinario e siman aki pa atende cu e rapport di Tweede Kamer.
E rapport di Tweede Kamer a conclui cu tanto funcionarionan halto como minister y secretarionan di estado a comete fout den e escandalo aki.
E mayornan victima den forma inhusto a wordo acusa di fraude y atendi fuertemente. Rutte na dos ocasion caba a yama e mandatarionan envolv cerca dje pa papia riba consecuencianan di e rapport.
Den e reunionnan aki a dicidi cu tur mayor cu a bira victima den e persecucion pa esnan cu a comete fraude rapidamente mester haya un compensacion di 30.000 euro
