Gobierno di Curaçao ta pidi SR. Saleh pa no participa na nada oficial den nomber di Curaçao y alabes pa entrega su retiro boluntariamente prome cu 30 di september 2023
Situacion na Corsou ta tenso riba henter e situacion di Ennia. Dia 14 di september ultimo a sali un carta (zaaknummer 2023/033461) pa Jaime Saleh. Prome minister di Curaçao Gilmar Pisas a manda un carta pa sr. Saleh indicando pa e abstene su mes na participacion nan y actividadnan publico , formal y otro ocasionnan cu lo presenta como minister di estado di Curaçao. Esaki ta debi na e problemanan persistente y e ultimo desaroyonan rond di e grupo ENNIA na momento cu sr.Saleh tabata comisionado di e grupo aki den e periodo cu su problemanan a surgi.
Tambe prome minister di Curaçao ta haci e peticion na sr. Saleh pa cu e titulo di minister di estado di e pais Curaçao pa e entrega esaki. E mandatario ta duna sr.Saleh e oportunidad di desisti di e titulo menciona riba su mes peticion (por escrito) te 30 di september 2023.
E carta ta bisa lo siguiente :
Estima Sr. Saleh
Di nos Minister Delega na Hulanda mi a haña sa cu durante e siman di Prinsjesdag, entre 18 y 22 di september 2023, abo como Minister di Estado di Corsou lo participa na algun reunion oficial y na e conferencia cu tin como tema ‘Cultura bibo y un sociedad duradero den Reino’
Sinembargo, den bista di e problemanan persistente y e ultimo desaroyonan rond di e grupo ENNIA, bo rol como ex-comisionado di e grupo aki den e periodo cu su problemanan a surgi, y e gran consecuencianan pa e asegurado y e conmocion social cu esaki a trece, mi ta pidi bo pa durante bo bishita na Hulanda expresa bo maximo moderacion (Terughoudenheid) tocante bo participacion den actividadnan publico formal y otro ocasionnan cu lo presenta bo como minister di estado di Curaçao.
Ademas, como consecuencia di e intervencion di Corte Uni di Husticia di 12 di september ultimo den e caso ENNIA y e actitud den e Estadonan cu a surgi como consecuencia di bo rol como Comisario na momento cu e problemanan a surgi den e grupo ENNIA, no ta posibel mas pa e gobierno pa mantene bo titulo di honor,dado e rol di ehempel social cu esaki ta inclui. E cosnan aki ta mas sensitivo den bo caso tambe, ya cu durante un periodo largo bo a traha den algun di e funcionnan di mas halto den nos structura constitucional, entre otro como presidente di e Corte Hunto di Husticia y Gobernador di Antillas Hulandes y despues di 10-10-10 como minister di estado pa e pais Curaçao.
Prome cu bo tuma un decision formal tocante di mantene bo titulo di minister di estado di e pais Curaçao, mi ta duna bo e oportunidad di desisti di e titulo menciona riba bo mes peticion (por escrito) te 30 di september 2023. Den caso cu no tin un peticion asina, gobierno mes lo mester tuma e pasonan necesario pa evita un escalacion social mas grandi rondo di e problema di ENIA.
Ademas, ya cu a haci preguntanan di Estado tocante bo rol den ENNIA, no ta exclui cu e contenido di e carta aki lo mester wordo regla cu e Estadonan.
FIN
Jaime Mercelino Saleh ta nace dia 20 di april 1941 y ta un politico y ex hues di Antia Hulandes. E tabata un hues den e Corte di Husticia di Antia Hulandes for di 1974 te 1990 y tabata su presidente for di 1979. Despues Saleh a sirbi como Gobernador di Antias Hulandes entre 1990 y 2002.
Saleh a wordo nombra como Minister di Estado di Hulanda Caribense na 2004. For di 2005 pa 2011 e tabata profesor di derecho constitucional di Reino Hulandes na Universidad di Utrecht. Na 2008 el a gana e premio Nederlandse Juristen Vereniging. Na e inauguracion di Rey Willem-Alexander riba 30 di april 2013 Saleh tabata e portado di e Carta pa Reino di Hulanda.
Saleh ta casa y tin cuater yiu, Su yiu muhe Eunice Saleh a bira Presidente di e Corte Hunto di Husticia di Aruba, Curaçao, Sint Maarten, y di Bonaire, Sint Eustatius y Saba na december 2016. Saleh tabata Presidente di e Corte ora e tabata conoci ainda como Corte Hunto di Husticia di Antias Hulandes. Saleh ta un Comandante di Orden di Orange-Nassau.
