Business Incubator “BusinesSpark” ta bira realidat
Pa diversifiká nos ekonomia i stimulá empresa chikitu i tambe empresario independiente, diputado Hennyson Thielman a introdusí e asina yama Business incubator. Esaki ta un sitio kaminda esnan ku ta kuminsá komo komersiante por bini huntu, haña inspirashon i stimulá nan kreatividat. Poniendo asin’ei un bon base pa por ta eksitoso ku nan kompania.
Un ‘business incubator’ ta un lokalidat kaminda empresario lokal por kompartí ofisina den un ambiente ku ta inspirá i ta duna guia na e empresa pa krese i bira eksitoso. “E nòmber di e ‘business incubator’ ta “BusinesSpark” ku ta representá e chispa pa stimulá negoshi. Mi ta konvensí ku e sentro aki lo bira e chispa pa aselerá aktividatnan nobo i kresementu ekonómiko,” diputado Thielman a bisa durante su introdukshon.
E meta di BusinesSpark ta pa stimulá empresa chikí i empresarionan independiente pa asina nan por sigui inová i diversifiká nan produkto i servisio. Esaki lo krea mas negoshi lokal na Bonaire, ku ta kontribuí partikularmente na inovashon i diversifikashon di e isla su ekonomía. BusinesSpark lo ofresé empresario lokal un espasio kaminda por interkambiá ku otro empresario, kombiná ku un programa di ‘coaching’, treineng i ‘networking’ pa stimulá e negoshi su desaroyo pa e bira eksitoso. Diputado Thielman ta splika: “Ku introdukshon di e ‘business incubator’ BusinesSpark na Boneiru, nos ke posishoná Boneiru komo un komunidat ku ta sostené inishativa empresarial, inovashon i kreatividat di nos mes hendenan.”
E partisipante ideal pa BusinesSpark ta un empresario lokal ku a kaba kuminsá òf tin kaba un negoshi den un ramo ku ta aportá na inovashon, sostenibilidat i diversifikashon di ekonomía. Pronto gobièrno lo saka aviso pa invitá empresarionan pa apliká. Pa bini na remarke pa partisipá den e programa di BusinesSpark, mester presentá un plan básiko di e produkto òf servisio di e empresa. Den tempu benidero lo duna informashon mas detayá tokante e programa.
E BusinesSpark na Playa ta marka e komienso di programanan pa sostené negoshi nobo i inovativo. Ta premirá ku den futuro lo krea mas BusinesSpark den otro barionan di Boneiru, dependiendo di e nesesidat. E business incubator ta bai ta situá sentral den e edifisio na Kaya Gilberto (Betico) Croes 1. Aktualmente ta renobando e edifisio pa konbertí esaki den un espasio modèrno ku ta inspirá kreatividat i kolaborashon. Durante e konferensha di prensa a desvelá e logo di BusinesSpark.
Empresarionan ku ta deseá di partisipá òf pa mas informashon, por tuma kontakto via imeil empresa@bonairegov.com òf yama na 715-5372.
