Un total di 400 mil Florin ta wordo poni disponibel pa proyectonan di innovacion pa aña escolar 2022.
Durante un conferencia di prensadiahuebs mainta, Prome Minister Evelyn Wever-Croes hunto cu representante di FUTURA, señor Pancho Croes a anuncia e lansamento di e proyecto innovativo “EduTech Fund”
Desde inicio di gobernacion di Gabinete Wever-Croes na aña 2017, innovacion tabata un prioridad y a wordo poni central den maneho di Gobierno. Innovacion no tabata solamente automatisacion sino tambe un forma nobo di busca solucion pa e diferente retonan.
Gabinete Wever-Croes a pone hopi atencion na innovacion organisando varios proyectonan atraves di FUTURA, cu e meta principal pa stimula pensamento innovativo y duna e hermentnan necesario na futuro generacionnan pa asina nan por yega na alcansa nan metanan. Gobierno conhuntamente cu FUTURA tambe a enfoca pa ekipa maestronan y mayornan pa nan por yuda e hobennan ta mas creativo y innovador den klas.
Durante e 4+ añanan di gobernaciona lansa tambe diferente iniciativa den innovacion den enseñansa na diferente scol, cuminsando cu Cacique Aterima cu ta e prome kleuterschool cu a wordo yuda cu ekiponan digital. Despues a sigui cu Cacique Macuarima, Pastoor Kraanwinkel y St Franciscus Colege.
“Awe, cu hopi orguyo y enthusiasmo Gobierno di Aruba conhuntamente cu FUTURA ta anuncia inicio di e e proyecto innovativo EduTech Fund. Un proyecto cu ta duna oportunidad na e scolnan basico y secundario pa bin cu ideanan innovativo y creativo pa nan scol. E fondo aki ta bay wordo reparti den 4 diferente ciclo cual prome ciclo ta cuminsa diahuebs 15 di September 2022 y lo termina 15 di November 2022. Cada scol tin 2 luna di tempo pa por entrega nan plan cu lo wordo evalua pa un comision independiente. Un total di Awg 100 mil ta wordo poni na disponibilidad pa cada ciclo pa un total di Awg 400 mil pa e aña escolar aki.
Prome Minister Evelyn Wever-Croes ta extende un invitacion no solamente na cabesantenan di scol sino tambe na maestronan, alumnonan di scol basico y scol secundario y mayornan pa tuma e oportunidad di bin cu ideanan creativo y innovativo pa e diferente scolnan. Na mayornan cu ta desea di wak mas cosnan inovativo pa nan yiunan na scol por presenta nan ideanan na e cabesante of maestro pa wak si e idea aki por bin na remarke pa wordo ehecuta na e yiu su scol.
