Durante un conferencia di Prensa na oficina di Aruba Tourism Authority, Gobierno di Aruba a anuncia cu dia 26 di februari proximo lo organisa un Parada Nacional di Luz cual lo hiba e nomber ‘Cend’e Mecha 2023’.
Mirando cu ya pa mas di dos aña caba no ta organisando carnaval pa motibonan conoci pa e pandemia y cu nos a drenta den e ‘exit strategy’ di e pandemia esaki ta un oportunidad pa e pueblo di Aruba por celebra e fiesta cultural di mas grandi di nos pais cual ta carnaval.
E parada nacional lo pasa riba e ruta tradicional di carnaval na Oranjestad y ta duna inicio na e celebracion di e luna cultural caminda nos ta celebra nos Himno y Bandera. Ministerio di Cultura hunto cu Ministerio di Turismo ta organisa e parada aki conhuntamente cu Departamento di Cultura Aruba y ATA cu ta pone fondo disponibel di nan presupuesto destina pa e celebracion di carnaval.
E Parada Nacional di Luz ta brinda un espacio na nos musiconan haya un oportunidad pa haya un entrada despues cu nan tambe a keda grandemente afecta pa e pandemia e ultimo dos añanan. Minister di Cultura Xiomara Maduro ta haci un invitacion na tur amante di carnaval pa participa den e Parada Nacional di Luz of bay aprecia esaki banda di caminda.
E anochi aki e colornan di nos bandera di Aruba lo briya. Tur grupo cu a confirma nan participacion por tuma contacto cu Departamento di Cultura Aruba pa mas informacion y inscripcion.
