Nos di ACCION 21 a tuma nota cu diabierna 10 di december 2021 e administracion Biden a blokea sosten financiero y diplomatico pa proyectonan nobo di fossil fuels incluyendo LNG. E paro inmediato di sosten federal pa proyectonan cu ta produci hopi carbon manera plantanan di gas ta representa un cambio di polisa. Motivacion tras di e cambio ta pa comabti cambio climatico y acelera energia renobabel rond mundo.
E directiva, prome raporta pa Bloomberg diabierna ultimo, ta historico y pa prome biaha Merca ta prohibi sosten di gobierno incluyendo biyones den financiamento y subsidio como tambe ayudo diplomatico y asistencia tecnico. E noticia a wordo couminca fin di siman pasa atraves di un kabel pa Embahada y Consuladonan.
Aunke e directiva tin algun excepcion, Bloomberg ta raporta cu e cambio den polisa internacional Americano lo por afecta cierto proyectonan incluyendo terminalnan den Caribe pa ricibi gas LNG desde Merca. Di awor en adelante gobierno Americano lo promove energia limpi, avansa tecnologianan innovativo y provee asistencia financiero y tecnico pa apoya transicionnan net-zero rond mundo. Esaki ta exactamente e direccion den cual Aruba tambe mester bay, no compromete nos futuro cu tecnologia di pasado pa proximo 20 aña.
Ambientalistanan a motiva President Biden pa haci dicho cambio, argumentando cu construccion di pipelinenan nobo, terminalnan di LNG nobo y proyectonan similar no ta consistente cu esfuersonan pa limita subida global den temperatura te cu 1.5 grado Celsius, asina evitando e consecuencianan mas catastofico di cambio climatico.
E ultimo desaroyonan di Gobierno Americano ta mas confirmacion ainda cu e deal cera entre WEB y Eagle LNG ta un catastrofe pa Aruba. No ta ningun coincidencia cu e firmamento ceremonial a tuma lugar diahuebs paso di diabierna en adelante ya no lo tabata posibel pa Consul Americano asisti bao di e polisa nobo. Ta un berguensa con Gabinete Wever-Croes II ta sigui manipula y gaña pueblo cu asistencia di nan medionan cumpra.
Dialuna den Parlamento nos di ACCION 21 lo sigui ilustra e iresponsabilidad di e acuerdo firma condenando nos pais pa 20 aña den futuro. Prijsnan di gas a fluctua enormemente e ultimo aña, awor te hasta gobierno Americano ta tuma distancia di e industria y na Aruba gobierno kier purba bend’e como algo bon pa nos pais.
Dia 2 di november 2021 mi a manda pregunta pa Ministro di Integridad Sr. Ursell Arends tocante e nombramento di e director nobo di Utilities y te ainda ningun respuesta. Dia 5 di november mi a manda pregunta pa Ministro Arends tocante e directiva nobo di Fundacion Lotto pa Deporte y te ainda ningun respuesta. Dia 5 di november mi a manda pregunta pa Prome Ministro tocante e acuerdo cu Bohama ariba e edificio bieu di douane y te ainda ningun respuesta.
Ta nan mes so nan ta gaña cu nan ta hibando un maneho integro. Mi ta admira cu sikiera un di e Parlamentarionan di RAIZ a lanta fe soño y cuminsa bisa ta basta. Cu tur e tantisimo ehempelnan di accionnan desintegro pa Gabinete Wever-Croes II den unicamente e dos luna y pico cu nan a sinta, ningun hende por kere nan capaz di crea e Aruba nobo cu RAIZ a priminti. Tin varios caso di corupcion bao investigacion di ministronan di gobierno actual cu ainda no a mira luz di dia. E unico cos manteniendo e gobierno aki na bida ta miedo di bay eleccion pa e dos partnersnan di coalicion.
Persisti lo resulta den e morto di RAIZ paso al final nan ta complice, mi ta spera e dos parlamentarionan di dicho paritdo no laga nan carera politiconan caba na shinishi paso Aruba mester di boso. Nos mester hobennan cu a rechasa politica tradicional y eherece e curashi di drenta arena politico pa trece e cambionan cu nos tur ta desea pa un mihor futuro. Ta tempo pa boso realisa cu e constelacion actual no tin e capacidad di cumpli cu boso principio y promesanan. Ta ora pa tuma accion, pueblo ta conta riba boso!
https://www.bloomberg.com/news/articles/2021-12-10/biden-halts-federal-aid-to-coal-oil-and-gas-projects-overseas