ORANJESTAD,Aruba
No ta nada straño cu gabinete Wever Croes durante di e crisis di Covid-19 ta exigi for di pueblo pa haci maniobranan cu nan mes ta bisa pueblo pa no haci, simplementa pa sirbi interes politico di nan mes.
Miembro di fraccion di AVP, sr Benny Sevinger a mustra cu for di prome dia e gobierno actual a haci cosnan contra interes di pueblo, cuminsando cu impone medida despues di a sigura cu lo no tin medida y sin cumpli cu cantidad di otro promesanan haci durante di campaña.
“No ta nada nobo y straño cu minister di infrastructura nobo ta exigi for di tur hende cu tin un huurgrond, pa bolbe bay yena un peticion sea cu nan areglo di tereno a vence of ta bay vence, caminda pueblo tin solamente algun siman pa haci esaki.
Mey mey di un crisis asina serio cu pueblo ta confrontando, e mandatario aki ta exigi pa tur hende bolbe inicia e proceso pa inscribi pa sea renoba nan permiso of pa pidi un huurgrond.
Ta mesun gobierno aki cu a tuma medidanan fuerte pa evita cu e virus mortal ta plama, e mesun gobierno cu a impone tanto toque de queda como shelter in place y pa colmo mesun gobierno cu a traha un lista di negoshi y servicionan cu ta “esencial” ta bira pidi tur hende pa busca un forma pa bolbe reinscribi nan mes.
Un locura cu no ta nada nobo cu e gobierno aki, ya cu pueblo a cera conoci caba cu e maneho di stress aki di gabinete Wever Croes, caminda algun siman atras hendenan cu a perde nan trabou, gobierno mes practicamente a bisa doñonan di trabou pa kita trahadonan for di trabou.
Gobierno a duna un carte blanche na tur empresa grandi pa retira nan trahadonan pa e ora e trahadonan aki bay inscribi pa asina nan por haya un ayudo di 950 florin di gobierno.
Mey mey di e locura di gobierno aki, nan ta Sali bisa cu hopi hende no a yega e formularionan aki corectamente, loke ta nifica cu practicamente e trahadonan aki lo no bay haya e 950 aki.
Pues por mira cu ta gobierno mes ta pone e trahadonan y henter pueblo den un stress pa bay yena formulario y na final ta bisa cu nan no a yena esakinan bon y lo no por haya e suma di placa menciona.
Despues di a core bin dilanti y sigura trahadonan cu a perde nan entrada cu nan lo wordo yuda pa gobierno cu e suma di 950 florin, gran mayoria cu a aplica awor ta scucha di mesun gobierno aki cu nan no a yega e formulario bon, consecuentemente nan lo no bin na remarke pa haya e placa.
Gobierno no a reuni cu doñonan di trabou pa yega na un consensus con pa yuda nan trahadonan pero a core Sali grita algo y awor e ayudo priminti ta birando imposibel pa hopi di e trahadonan aki.
E mesun stress aki e minister di infrastructura ta presionando tur hende cu tin huurgrond cune, demandando pa nan aplica di nobo, yena formulario di nobo sino nan lo perde nan derecho riba nan tereno di huur.
Ningun caminda por ripara cu e topico aki tabata riba lista di gobierno di ta algo esencial pero ta bolbe keda demostra cu Aruba tin un gobierno cu tur hende ta traha pa nan mes pero ta pueblo ta keda esun mas perhudica,” Parlamentario Benny Sevinger a mustra.
![Gobierno A Duna Doño Di Trabou Carte Blanche Pa Manda Trahado Cas Pero Awor Trahadonan Tin Problema Pa Haya 950 Priminti 155 Whatsapp Image 2020 04 28 At 3.54.50 Pm](https://www.earubianonews.com/wp-content/uploads/2020/04/WhatsApp-Image-2020-04-28-at-3.54.50-PM.jpeg)