Gobierno den un carta fecha siman pasa a informa Errol Sjak Shie cu su relación laboral cu gobierno a finalisa. Sjak Shie tabata traha na Departamento di Infrastructura y Planificacion (DIP) for di aña 2019.
Den e carta cu a manda p’e ta inform’e cu el a wordo tuma den servicio na januari, 2019, pa e periodo di Gabinete Wever Croes I, cual gobernacion a finalisa dia 19 di september, 2021.
Tur persona cu drenta den servicio di un Gobierno, sea como consultant, consehero of coordinador, ta haci esaki pa e periodo di gobernacion. Manera ta wordo bisa, ta drenta cu e gobierno y ta bay cu e gobierno. Den e caso aki, den luna di september a logra yega na un acuerdo di gobernacion y e ministernan apunta te cu nan a huramenta. Esaki ta nifica cu automáticamente tur esnan cu tabatin un contracto firma door di un Minister di e Gobierno anterior, mester bay cas. Si dicidi di sigui cu nan servicio mester firma un contracto nobo.
Mirando e salario cu Sjak Shie tabata ricibi y e condición di Hulanda pa baha gasto, mayoría di e contractonan grandi aki no ta wordo prolonga. Banda di dje, e relación entre e y empleadonan di DIP no tabata esun miho. Mescos cu den e caso di e director di DIP Haime Croes, e empleadonan a hasta bay den accion pa motibo di no ta confia den maneho, cu nan ta bisa, no ta esun stipula door di Gobierno y e Minister. A sinti cu a by pass e maneho aki, y tabata perhudica e ciudadano humilde. Funcionario no solamente a bay den accion pero na ultimo, ora cu e cartera tabata den man di e Prome Minister, a acerca su persona cu e peticion pa intermedia.
E información ricibi for di paden di personanan cu ta prefera di keda anonimo pa miedo di represalia, ta cu hopi iregularidad a sosode den e periodo cu e departamento aki tabata cay bou di ministernan di POR, cuminsando cu Otmar Oduber y despues Marisol Lopez Tromp. Inclusive ora cu a baha Lopez Tromp, Sjak Shie a keda pa cual indirectamente e político tabatin su influencia eyden. Di e forma aki e por a haci hopi promesa di tereno, a tuma luga iregularidadnan cu huurgrond (cu ta bou di investigacion) y cu ruman di e politico y exminister por a haya su peticionnan (entre otro cambio di bestemming di terreno) den menos cu ocho dia. P’esey e empleadonan ta mal contento no solamente cu Sjak Shie pero tambe e director, ya cu e tabata e persona cu a comete conflicto di interés door di duna conseho y e mes ta otorga of bay di acuerdo cu peticionnan.
Tur esakinan ta entre otro den e investigacion amplio cu tin andando relaciona cu terenonan otorga y cual investigacion antes tabata hiba e nomber di Aloe, segun director Haimecroes , pero realidad ta cu e caso ta caso Aloe.
Probablemente e forma di proceder di Sjak Shie por tabata un di e motibonan, ademas di e peso financiero, cu no a mira e necesidad di sigui haci uzo di su servicionan, mirando cu e ta cobra directamente den e presupuesto di minister di infrastructura y no di DIP mes.
Sjak Shie y Croes probablemente cu conocemente di e Minister a haci hopi maniobra den DIP.
Ta duda cu e minister Tromp siendo un persona hopi sabi no a tuma nota di e cosnan aki. Sinembargo prome minister actual cu tambe ta carga e cartera di infrastructura si ta tumando acion na bienestar general di Aruba
