Den presencia di miembronan di Conseho di Minister, Prome Minister Evelyn Croes a papia cu prensa riba e situacion cu a surgi awe. Despues cu Ministerio Publico a emiti un declaracion riba un investigacion penal contra un fundacion di fraccion di POR, el a dicidi di baha gobierno.n Ta trata di un sospecho di malversion.
Inmediatamente el a bay gobernadora pa informa cu tur minister ta tuma nan retiro. Integridad ta forma parti di e programa di gobernacion y violacion di esaki, segun e mandatario ta algo hopi serio. Despues di e anuncio a consulta internamente di kico ta e miho reaccion riba un sospecho asina di un miembro di coalicion. A conclui cu mester entrega retiro y disolve Parlamento. Y a haci esaki na gobernadora, kende tin esaki den consulta.
Gabinete Wever Croes awo ta demisionario y lo atende solamente aspectonan coriente. Un fecha nobo pa eleccion no a wordo fiha ainda. E hecho cu un persona ta wordo considera sospechoso ta algo hopi serio y ta mishi cu integridad. “Awe ta un dia hopi dificil pa mi y mi coleganan. Cualkier parlamentario cu wordo considera como sospechoso mester tuma su retiro.”
Minister Husticia Andin Bikker, a pesar cu e ta candidato di POR lo keda forma parti di e gobierno demisionario. Mester bisa cu e mandatario inmediatamente a distancia di partido POR despues di e decision tuma door di Conseho di Minister pa entrega nan retiro.
E diferencia entre e caso aki y esun di Otmar Oduber, el a splica, ta diferente den e sentido cu na momento cu Otmar Oduber a wordo acusa e no tabata miembro di Conseho di Minister mas, mientras cu e fraccion POR ta sostene e actual gobierno. MEP no por acepta algo asina na momento cu tin un sospecho riba e fundacion di e fraccion.
E fundacion di fraccion POR ta wordo maneha na nivel di Parlamento y esaki ta algo cu Minister Bikker a bisa e no ta envolvi den dje.
Prome minister a bisa cu ta trata aki di violacion di integridad, cu ta algo cu gobierno a bisa semper cu ta para pa cumplimento di esaki.
Wever Croes a enfatisa cu lo sigui cu tur palabracion haci, apesar cu nan ta demisionario, y maneho di pais Aruba. Parlamento tin su mesun responsabilidadnan.
