E aña cu ta bini ta bolbe aumenta e suma di pensioen pa
nos grandinan. Esaki lo bira e di cinco biaha cu ta hisa pensioen bou di Gabinete Wever-
Croes. Esaki ta nifica cu pensioen a subi cu 15% caba y ta na caminda pa sigui aument'e.
Lider di Fraccion di MEP den Parlamento, Parlamentario Hendrik Tevreden, a elabora riba e
importancia di e aumento aki cual ta un paso importante pa sigura cu nos grandinan por biba
dignamente. Apesar cu a bisa esaki na prensa, toch algun ta busca forma pa malinforma. Pero
e realidad ta cu Gabinete Wever-Croes y Minister Dangui Oduber ta aumentando pensioen pa
beneficia tur pensionado sin e necesidad subi edad di pensioen manera AVP si a haci
castigando henter pueblo, a declara.
"Nos grandinan a contribui hopi na nos comunidad durante nan bida laboral, y ta crucial pa
nos gobierno y nos pueblo honra nan esfuersonan brindando nan un pension adecua na nan
edad avansa," Tevreden a bisa.
KICO MAS TA TUMANDO LUGAR?
Entrante Januari 2024 e prima di AZV a worde reduci pa e pensionadonan cu tin e edad di 65
aña of mas. Te cu aña 2023, e pensionadonan tabata paga 6,5% riba e prome Afl. 30.000 di
entrada of salario. Si e entrada of salario aki surpasa Afl. 30.000 pa aña, e pensionado ta paga
10,5% na prima di AZV riba e suma restante.
Fo'i 1 di januari 2024, e porcentahe riba e prome Afl. 30.000 di entrada lo baha na 5%. Pues
un reduccion di 1,5%. Na januari ultimo, conforme decision di Conseho di Minister,
Departamento di Impuesto a anuncia cu e porcentahe a worde reduci y a bira 5,5%.
Mientrastanto, e decision a wordo adapta y e porcentahe a wordo stipula na 5% entrante 1 di
januari 2024.
AUMENTO DI PENSIOEN NA 2025
Awor, e decision pa a aumenta e suma di pensioen un biaha mas pues pa di cinco biaha den
2025, segun Parlamentario Tevreden, ta un indicacion di e compromiso serio di Gabinete
Wever Croes pa mehora e calidad di bida di e pensionadonan. "Esaki ta mustra cu nos
gobierno ta atento na e necesidadnan di nos grandinan y ta trahando pa nan bienestar," el a
agrega.
Banda di e aumento di e pensioen tin e reduccion di e prima di AZV pa e pensionadonan cu
tin 65 aña of mas. E reduccion di e prima ta un medida cu ta beneficia directamente e
pensionadonan, ya cu nan lo haya un alivio financiero significativo. "Nos ta contento cu nos
gobierno ta tuma accion pa alivia e carga financiero di nos grandinan" y na un manera
responsabel y realistico, Parlamentario Tevreden a comenta.
Sinembargo Tevreden a subraya cu mester keda atento na e necesidadnan cambiante di e
comunidad, particularmente di e grupo di pensionadonan. "Nos ta comprometi pa sigui
monitorea e situacion di nos grandinan y tuma e accionnan necesario pa garantisa nan
bienestar continuo," el a conclui.
Gobierno a aumenta pensioen pa nos grandinan 4 bes y na forma responsabel
