Gobernador suplente di Aruba a firma diferente decretonan nacional y a ricibi algun bishita

Gobernador suplente di Aruba, Su Excelencia Agustin Vrolijk, desde diaranson anochi 27 di april te cu diadomingo anochi 8 di mei, ora cu Gobernador Boekhoudt tawata den exterior, a asumi e puesto di Gobernador. El a ehecuta e trabaonan regular di un Gobernador, manera firmamento di decretonan nacional. Tambe a ricibi algun persona pa un audiencia.
Riba diabierna 29 di april 2022 a ricibi señor Dirk Buitelaar, Regional Manager Air France KLM, pa un audiencia na Gabinete di Gobernador. Señor Danilo de Freytas (KLM Sales Manager Aruba) a acompaña señor Buitelaar durante di e audiencia di introduccion aki. Topiconan di combersacion tawata entre otro e conexionnan aereo di KLM den region Caribense y e situacion actual na Schiphol.
Commandant Zeestrijdkrachten VADM René Tas, cu tawata cu bishita di trabao den e region Caribense, tambe a bishita Gobernador suplente Vrolijk na Gabinete di Gobernador. A papia entre otro tocante e barco Zr.Ms. Friesland cu desde januari ta patruya den e region Caribense di Reino y tocante e desaroyo di e militarnan Arubiano (ARUMIL). Cu e Comandante di Marinierskazerne Savaneta, LTKOLMARNS Art van Beekhuizen cu tambe tawata presente durante di e audiencia, a papia tocante e adelantonan di e Sociaal Vormingstraject (SVT) na Aruba.
Riba diaranson 4 di mei 2022 tambe a tuma luga dos audiencia na Cas Ceremonial di Gobernador. Mainta tempran a ricibi Consulado-General di Republica Dominicana, señor Pedro A. Ventura Cruz. Ta prome biaha cu señor Ventura Cruz, biba na Aruba, a cera conoci cu Gobernador suplente di Aruba. Topiconan di combersacion a trata entre otro e deseo di Republica Dominicana pa introduci comercio liber di mercancia entre Aruba y Republica Dominicana, posibilidadnan pa cuido medico na Republica Dominicana y e posibilidad pa personanan di Aruba participa aya na cursonan di deporte.
Seguidamente Gobernador suplente a ricibi señor Robert Schuddeboom, Embahador di Reino na Caracas, Venezuela. Na mei aña pasa señor Schuddeboom a bishita Aruba y a cera conoci cu Gobernador Boekhoudt. Ta prome biaha cu e embahador ta topa cu Gobernador suplente Vrolijk. Topiconan di combersacion durante di e audiencia a trata entre otro e situacion encuanto un cantidad di Arubiano deteni na Venezuela y e estado di e negociacionnan entre Reino y Venezuela tocante reapertura di frontera entre Aruba y Venezuela. E embahador a informa Gobernador suplente tambe tocante e desaroyonan economico na Venezuela.
Entrante awe, 9 di mei, Gobernador Boekhoudt ta bek den funcion.