Despues di a eherce e funcion di Gobernador interino di Aruba pa un periodo di cinco aña, Su
Excelencia Yvonne Laclé-Dirksz ta retira entrante 1 di december 2021. Desde e fecha menciona,
señor Agustin Vrolijk ta tuma e funcion over.
Señora Yvonne Laclé-Dirksz
Den un carta dirigi na Su Mahestad Rey Willem-Alexander anteriormente e aña aki, Su Excelencia
Yvonne Laclé-Dirksz a pidi Su Mahestad pa otorga su retiro. Señora Laclé-Dirksz a indica cu el a cumpli
cu e encargo honorabel di Gobernador interino cu gran dedicacion durante e ultimo cinco añanan. E
decision personal pa renuncia prome cu fin di e termino di e funcion ta crea espacio pa dedica mas
tempo y atencion den ambiente familiar.
Postulacion y nombramento
E Conseho di Minister di Aruba a postula señor Agustin Vrolijk como Gobernador interino nobo di
Aruba. Durante di e Rijksministerraad di awe, a aproba esaki. Su Mahestad Rey Willem-Alexander lo
nombra señor Vrolijk pa medio di un Decreto Real (koninklijk besluit). Riba diamars 30 di november
e Gobernador interino nobo ta huramenta den presencia di Gobernador di Aruba, Su Excelencia
Alfonso Boekhoudt. Rey Willem-Alexander a apunta Gobernador Boekhoudt pa esaki.
Aceptacion di encargo
Manera stipula den articulo 14 paragraf 2 di e Reglamento di Gobernador di Aruba, e Gobernador
interino ta acepta su encargo door di entrega un copia di e Decreto Real encuanto su nombramento
y un proces-verbaal di su huramentacion na Parlamento, durante di un reunion solem di Parlamento
di Aruba. E reunion solem aki ta tuma luga riba diaranson 1 di December 2021.
Señor Agustin Vrolijk
Despues di a cuminsa su carera den sector educativo, despues di a sigui estudionan di ley aki na Aruba
y despues specialisa den derecho aero y especial na Canada, señor Vrolijk a haya años di experencia
laboral como abogado den sector di aviacion. Di 1987 te cu 1995 el a eherce e funcion di Hefe di
Asuntonan Huridico, Economico y Internacional na Directie Luchtvaart Aruba (DLA), despues di cua
entre 1995 te cu 1999 e tabata Director interino na e instancia aki. Durante di algun luna e tabata
secretario di e Comision Seguridad y Combatimento di Terorismo. Di 2002 te cu 2012 señor Vrolijk a
eherce e funcion di Director na Directie Buitenlandse Betrekkingen (DBB). Despues, pa un temporada
cortico el a eherce un puesto di maneho na Aruba Airlines, cu dedicacion especificamente pa e
aerolinea por bira operacional.
