Riba diahuebs 2 di maart ultimo Respaldo tabatin e honor di ricibi un bishita di trabou di Gobernador, sr. Alfonso Boekhoudt.
Durante e bishita di trabou aki Gobernador a ricibi hopi informacion pa medio di diferente presentacion di diferente psikiatra. Asina a splica e processo di añas cu a wordo hiba promer cu na 2017 finalmente a funda e organisacion nobo pa salud mental na Aruba, cu despues a ricibi e nomber di Respaldo.
Cu hopi orguyo a splica Gobernador di e trabounan cu Respaldo a bin ta eherce den e ultimo 6 añanan, manera: expansion di personal cu casi e dobbel di locual a cuminsa cu ne; e diferente servicionan nobo cu ta ofrece, por ehempel ECT (Electroconvulsietherapie) cual Respaldo ta actualmente e unico den region di Caribe Hulandes cu ta ofrece e tratamento aki cu resultadonan hopi positivo; introduccion di FACT-teams pa adultonan cu ta duna servicio ambulatorio door di un team multidisciplinario di profesionalnan; POPP-poli cu ta un cooperacion entre diferente instancia/profesional specialmente pa duna guia na muhernan embaraza cu tin (e riesgo di desaroya) problemanan psicico. Tambe e cantidad di clientenan cu ta ricibi ayudo profesional pa problemanan psicico a aumenta grandemente den e ultimo añanan. A logra habri un extra localidad na Mahuma pa ta mas central y asina yuda mas cliente posibel. A inicia diferente cooperacion cu otro instancianan local como regional; A introduci un sistema moderno completamente electronico pa registra tur datos di e clientenan (Elektronisch Patiënten Dossier); tambe a ofrece diferente curso y estudio pa sigui desarolla e personal trahando den cuido mental; pero tambe a logra ricibi un visitatie di e Nederlandse Vereniging van Psychiaters cu ta evalua periodicamente e cuido cu ta wordo ofreci y ta duna feedback pa mehoracion.
Gobernador a ricibi despues un presentacion di e planes pa futuro unda entre otro a pone e enfasis riba deseo pa por cumpli cu e necesidad pa Aruba tin su propio crisisdienst. Esaki lo yuda hasi e cuido necesario yega mas liher na e cliente, baha e presion ariba cuerpo policial y yuda disminui e stigma cu tin ora polis mester interferi ora un cliente bira hopi malo. Tambe tin planes pa sigui desarolla e ‘forensische zorg’ na Aruba cu e objetivo cu (ex) detenidonan cu problemanan mental lo ricibi asistencia y tratamento mas enfoca riba nan necesidad. Por ultimo a splica Gobernador durante e parti aki e desafionan cu Respaldo tin pa por sigui desaroya den e añanan venidero y asina cumpli cu e necesidadnan cu pais Aruba tin.
Despues di e parti aki a bai over na duna Gobernador splicacion mas detaya di e diferente departamentonan y servicionan cu Respaldo ta ofrece. Psikiatra pa mucha y hobena duna un presentacion extenso di e servicionan cu e departamento di Policlinica pa Mucha y Hoben ta ofrece. Asina a splica cu e policlinica pa Mucha y Hoben ta existi apenas desde 2009 y a duna splicacion di kiko ta e tipo di trastornonan cu ta ser considera ‘specialistische ggz’, cu ta e grupo cu Respaldo ta atende. A duna tambe splicacion over e lista di espera y cu esey e desafio cu ta enfrenta pa por brinda e servicio necesario. Un di e desafionan mas grandi cu e policlinica di Mucha y Hoben ta enfrenta ta e escazes cu tin pa haya GZ-psychologen pa por yuda atende cu e lista largo di espera cu tin. Tambe ta un problema cu actualmente no tin un localidad pa admitimuchanan bou di 18 aña cu problemanan psicico serio y compleho. Tur esaki siendo cu e tratamento pa mucha y hoben ta di sumo importancia mirando cu estudionan ta mustra cu trata trastornonan mental mas trempan posibel ta hopi mas efectivo cu warda te na adulto pa ricibi tratamento; e dañonan ta hopi mas extenso y e costonan lidia hopi mas halto. Despues a duna splicacion di e departamento di policlinica di adulto, e FACT teams y e POPP-Poli.
Por ultimo Gobernador a ricibi un rondleiding door di e diferente departamentonan ubica den Clinica Respaldo. Di e manera aki Gobernador a haya e oportunidad di wak di serca unda e clientenan ta hospeda, kiko nan ta hasi y dialoga cu e trahadornan riba vloer.
Tabata un atardi di hopi informacion unda Gobernador a mustra hopi interes pa e cuido di salud mental na Aruba. Staff y personal di Respaldo kier un biaha mas gradicí Gobernador pa e bishita placentero aki como tambe e interes cu Gobernador a mustra pa cu e temática importante aki.
