Gobernador di Aruba, señor Alfonso Boekhoudt awe mainta na Cas Ceremonial di Gobernador a huramenta señor Ady Thijsen como Minister Plenipotenciario di Aruba na Hulanda.
Despues di e huramentacion minister Thijsen a duna un declaracion unda ela bisa di ta sumamente contento di mira cu den transcurso di su carera politico, awe el a haña un otro responsabilidad cu no ta den Parlamento di Aruba. Señor Thijsen su unico meta ta pa traha na bienestar di pais Aruba y cu hopi honor a tuma e responsabilidad aki cu sigur no lo ta uno facil.
Señor Thijsen ta gradici gobierno di Aruba pa dune e confiansa como Minister Plenipotenciario na Hulanda y alabes como representante di Aruba na Union Europeo. Tambe el a tuma e oportunidad pa gradici esnan cu semper a sa di sostene su persona durante su trayecto como politico, specialmente su hendenan di Savaneta cu semper a kere den su persona.
