Pueblo di Kòrsou por a tuma nota di e konsternashon ku a surgi awor ku sr. Ayoubi a entrega su karta di retiro na Presidente di Parlamento. Konforme “Kiesreglement” Konseho Supremo Elektoral mester kana e kaminda deskribí den e lei menshoná pa yena e vakatura ku a presentá.
Algun siman pasa ora señora Rozendal a entrega su retiro, frakshon di MFK a keda sorprendí pa e forma rápido ku Konseho Supremo Elektoral a atendé ku e prosedura pa señor Schoop por a drenta den Parlamento, den un lapso di tempu di ménos ku 48 ora tur kos tabata kla.
Den e siman ku a transkurí nos por a tuma nota den un programa di televishon ku miembro di Parlamento señor Walroud a duna di konosé ku mirando ku señora Alcala-Walle ta un sospechoso (PAR su forma arogante atrobe di trata ku e ser humano), PAR a duna Konseho Supremo Electoral un man den e proseso pa yega na e karta di retiro di señora Marilyn Alcala-Walle.
Despues durante di un programa radial di djasabra último, nos por a tende presidente di Konseho Supremo Elektoral señor Römer deklará ku ainda e kandidato number 1 riba lista di partido PAR no a manda su karta pa ninga su postulashon komo miembro di Parlamento, esei ta nifiká ku e prosedura ta leu for di ta kla. Miéntras ku Presidente di Parlamento ta pa papia di huramentá un miembro nobo di Parlamento sin ku su kredensialnan a yega Parlamento.
Frakshon di MFK kier manda un mensahe hopi kla pa Konseho Supremo Elektoral, bosnan ta un instansia independiente i ta bosnan tarea pa ehersé e trabou konforme “Kiesreglement” i no por ta asina ku bosnan ta permití ku un partido polítiko ta bai duna bosnan un man pa ehersé bosnan trabou. Si Konseho Supremo Elektoral ta permití òf ta laga un deklarashon manera esun di señor Walroud pasa bai, esta ku PAR mester duna Konseho Supremo Elektoral un man den su trabou, esei ta nifiká ku Konseho Supremo Elektoral ta akseptá ku nan no tin e kapasidat pa ehersé e trabou.
Ta di lamentá ku te awe Konseho Supremo Elektoral no a saka un deklarashon ofisial i desbaratá e deklarashon nan aki di Parlamentario Walroud. Den pasado MFK tabatin hopi kritiká riba e funshonamentu i imparsialidat di miembronan di Konseho Supremo Elektoral. E krítikanan aki a kousa doló i lágrima serka e miembronan, pero ta tipo di kosnan asina aki ta trese duda den integridat i imparsialidat di órgano ta importante aki.
Nos kier kaba e komunikado aki ku e siguiente dicho pa miembronan di Konseho Supremo Elektoral “Wie Zwijgt Stemt Toe”, Konseho Supremo Elektoral sali i papia kos kla pa kita tur duda, nos ta den porta di un elekshon i MFK ke un elekshon liber, sekreto i transparente, konforme nos Areglo di Estado i “Kiesreglement”.
