Fin di siman a tuma lugar den Piedra Plat Entertainment Center e segundo entrega anual di e awards na e atletanan cu mas a destaca den 2022. MC oficial tawata Addonsito Croes. Giants Aquatics Aruba ta un organisacion di natacion cu ta existi 3 aña. Tawata e Headcoach Jordy Groters cu na 2020, rond di e pandemia, esun cu a bini cu e idea di lanta e club aki. Nan a cuminsa cu 13 atleta y awo den 2023, a crece na 60.
Cada un di e 60 atletanan a ricibi un certificado oficial pa nan prestacion den 2022. Tambe a entrega 10 award na e 10 atletanan cu mas a destaca. Den su speech e presidente sra. Zuleika Silva, a gradici cada atleta, mayor y colaborado pa nan sosten. Entre otro el a gradici Ames Brinkman, Meggy Kerpens, Stephanie Croes, Danilo Rudolfo, Maureen Croes, Miroushka Statia, Maychell Carrera, Jeff Feliciano, Kimberly Boekhoudt, Tai Foo Lee, Kehdy Griffith, Dylan Fingal y Addonsito Croes.
E coachnan Jordy Groters, Darwin Marchena, Kevin Dijkhoff, McKenzie Curtney y Rochendra Vrolijk por ta orguyoso di nan alumnonan cu ta prestando tremendamente. Por menciona cu Giants Aquatics tawatin clasificacion pa Carifta, clasificacion pa Pan Am na Trinidad & Tobago, premio Excelencia den deporte 2022, bunita resultadonan na Plantation y un “Giant” cu tawatin e curashi pa landa entre dos isla.
Tanto Zuleika Silva como Jordy Groters ta comparti e filosofia di duna e mucha e tools y asina e por construi su meta. Potretnan ta cortesia di Ames Brinkman y 297Sports.
