Siman pasá gezaghèber Edison Rijna a hasi un bishita di trabou na Den Haag relashoná ku su funshon di supervisor di òrden públiko, siguridat i kombatimentu di kalamidat na Boneiru. Tópiko di e diferente kòmbersashonnan – entre otro ku minister di Infrastruktura i Maneho di Awa, Mark Harbers – tabata e rapòrt ku resientemente gobièrnu a risibí tokante maneho di awa integral.
Ekspertonan bou di guia di ‘dijkgraaf’ Hein Pieper di ‘Waterschap Rijn & IJssel’ riba petishon di gezaghèber i despues di a mira e situashon lokal, a hasi algun rekomendashon tokante kua ta e medidanan ku mester tuma pa kombatí molèster di awa i pa evitá daño na naturalesa, teniendo kuenta ku yobida mas pisá komo konsekuensia di kambio di klima. Gezaghèber a papia ku minister Harbers i su staf tokante medidanan ku ta nesesario pa atendé riba término kòrtiku ku problemanan urgente i tokante kiko ta nesesario riba término mas largu pa strukturalmente yega na un maneho di awa duradero.
‘Pa tur partido ta bon kla ku Boneiru so no por hasi esaki. Riba tereno di maneho di awa Hulanda ta lider na mundu, pues nos no tin mester di bai buska hopi leu pa haña ekspertisio i sosten na momentu di ehekushon di e rekomendashonnan’, segun gezaghèber Rijna, despues di su bishita na e ofisina prinsipal di Waterschap Rijn & IJssel. Banda di e enkuentronan akí gezaghèber Rijna a hiba kòmbersashon tambe ku ministerio di Asuntunan Ekonómiko i Klima i ku kwartiermaker Ed Nijpers tokante progreso di e mesa di klima pa Boneiru. Ta spera e rapòrt tokante esaki na luna di mei.