Gezaghèber Edison Rijna a biaha pa Brussel pa un bishita di trabou riba 20 i 21 di yüni, kaminda el a dediká su tempu prinsipalmente na fortifikashon di e lasonan ku stakeholdernan i institutonan di Union Oropeo. El a kuminsá su programa ku un konsulta ku Representashon di Hulanda na Brussel. Staf di e representashon a bisa ku gustosamente nan ta dispuesto pa hasi uso di e ret den sírkulonan di Union Oropeo pa Boneiru tambe.
Komo Territorial Authorized Officer gezaghèber Rijna na nòmber di Entidat Públiko Boneiru ta esun ku na promé lugá ta responsabel pa mantené kontakto ku Union Oropeo. Ku e Representashon el a papia tokante e bali internashonal pa kua el a tuma inisiativa i ku lo bai forma parti di su gabinete. E bali internashonal, banda di ehekushon di programanan di Union Oropeo ku ya kaba ta kanando, lo bai dirigí su mes tambe riba atraé vários fluho di finansiamentu alternativo pa Boneiru. Por pensa akí riba programanan di Union Oropeo ku no ta spesífikamente destiná pa Teritorionan Ultramar di Union Oropeo, pero riba kua por hasi un apelashon sí ku un aserkamentu aktivo.
Na e Directorate General for Defense Industry and Space (DG Defis) gezaghèber a haña un presentashon di e Programa di Inovashon i Espasio di Defis, kaminda entre otro a papia tokante e programa di Cassini pa ‘Startups’ i Empresa Chikitu i Mediano. Aparte di esei EUSPA a duna un presentashon tokante posibel desaroyonan interesante den mundu di digitalisashon i programanan espasial. Via e bali internashonal den e periodo binidero lo investigá kiko e programanan akí por nifiká pa Boneiru. Rijna a hasi uso di e oportunidat pa boga pa e proyekto di Galileo, pa kua nan ta konstruí un stashon di sensor na Boneiru, haña un kontinuashon.
Ku e direktor pa Amérika Latino i Karibe di Directorate International Partnerships, Jolita Butkeviciene, banda di kasonan ku ta kanando, Rijna a papia tokante e posibilidatnan pa habri un ‘technical office’ for di Union Oropeo na Boneiru. Gezaghèber a hasi uso di su presensia na e konferensia di European Development Days pa establesé kontakto ku vários partido pa sondia kua ta e oportunidatnan di kolaborashon ku tin pa Boneiru. Riba djárason 22 di yüni Rijna a biaha pa Den Haag pa entre otro deliberashon ku diferente ministerio i un enkuentro ku e komishon di Tweede Kamer pa Relashonnan den Reino.
