KRALENDIJK, Bonaire
Ningun gobièrnu no por hiba bon maneho sin partisipashon di komunidat. P’sei mes Kolegio Ehekutivo ta kontentu ku Diálogo Sentral den kua ta diskuti kestion importante pa desaroyo di nos isla ku representantenan di e sektor komersial/industrial i sindikato, a kuminsá asina bon.
Despues di e enkuentro inisial eksitoso 15 di novèmber 2018 i firmamentu di un deklarashon huntu 3 di òktober 2019 ku sekretario di estado Tamara van Ark di Asuntu Sosial i Empleo,
partisipantenan a traha duru na un kuadro di maneho komun pa e periodo di 2020-2023. Título di e dokumento akí ta reda ambishonnan: ‘Un futuro briante’.
Den e kuadro di maneho ku tur partido ku ta partisipá na e Diálogo Sentral a firma, tin un kantidat grandi di tópiko ku ta di importansia pa bienestar i prosperidat di komunidat boneriano, pero ku solamente por atendé ku nan eksitosamente si gobièrnu, dunadó di trabou i trahadó huntu pone nan skouder bou di esakinan.
Por lesa e kuadro di maneho komo un agènda di dosié ku Diálogo Sentral e añanan ku ta bini no solamente ta bai atendé, sino ke realisá resultado konkreto tambe dunando gobièrnu di reino konseho pidí i no pidí pa mehorá klima di invershon (por ehèmpel ku bahamentu di kosto di hasi negoshi), redusí pobresa (oumento di suèldu mínimo, kompensashon pa yu i AOV), tira bista krítiko riba derechi di trahadó, etc.
,,Ku eskoho di tópiko, Diálogo Sentral ta uni su mes ku e prioridatnan ku ta den e Akuerdo Intergubernamental ku Hulanda i den e programa di gobernashon. Komo Kolegio Ehekutivo ta bon pa hasi uso di konosementu i idea di organisashonnan ku ta aktivo den komunidat i den práktika diario tin di ber ku efektonan di desishonnan di gobièrnu. Awor nos tabatin sinku enkuentro di Diálogo Sentral i mi ta konstatá ku gran satisfakshon ku tur partisipante ta dispuesto pa tene kuenta ku otro su miembronan pa despues yega na akuerdo kon por sirbi mihó interes general.”, segun gezaghèber Edison Rijna. Organisashonnan ku ta representá den Diálogo Sentral ta: Usibo, BBE, KdK, Bonhata, BHG i Kolegio Ehekutivo.
