Manera mi a splika siman pasá, e aña akí nos no por selebrá Dia di Rincon manera nos ta kustumbrá. Por selebrá e dia sí den seno familiar teniendo kuenta ku e reglanan di nivel di riesgo 4. Hendenan bibá den un kas por bai bishitá un otro famia, na tur no tin mag di tin mas ku 10 adulto ku ta bini huntu.
No por tene fiesta òf evento. Pa evitá aglomerashon mi ta urgi hende ku no ta bibá na Rincon, òf no ta traha ei, pa no bai Rincon. No tin aktividat festivo pa selebrá. Lo tin solamente aktividatnan virtual ku públiko por sigui via medionan sosial.
Si resultá ku tin aglomerashon tòg na Rincon, polis lo aktua mesora.
Ministerio Públiko ta informá ku nan ta hisa e but pa aglomerashon na e suma máksimo di 280 dòler. Ta subi tambe e but pa violensia kontra polis i si hende insultá polis.
Tur e medidanan di prekoushon akí ta pa evitá ku e vírùs di corona por plama. Nos tur ta lamentá ku Dia di Rincon no por sigui. Ami ta sali na defensa di salú di un i tur. Mi ta hasi un apelashon riba bo sentido síviko i spera ku bo ta hasi meskos pa asina otro aña nos por selebrá Dia di Rincon normal atrobe.
Mi ke hasi un apelashon en partikular na nos hóbennan pa nan respetá e reglanan eksistente. Tene kuenta ku si bo aktua iresponsabel, esei tin konsekuensia pa bo mes, bo famia, i nos komunidat.
Mi ke bisa por último ku ta tradusí e deklarashon akí na spañó i ingles i ku ta pone nan riba medio sosial pa asina nos komunidat kompletu ta informá
1 comment