Gezag Edison Rijna a duna un speech oficial riba e situacion di COVID 19 na Boneiro . E speach ta cuminsa di e manera aki : Awe lo mi papia di petishon pa bai bèk na kódigo hel, e ordenansa di emergensia nobo ku a drenta na vigor 28 di òktober i e eksigensianan pa bini Boneiru. Lo mi kuminsá ku e situashon tokante kasonan di Covid-19.
Despues ku a pasa algun dia ku no a registrá niun kaso positivo, a bini tres kaso nobo aserka e siman aki. Awe por anunsiá ku kuater persona a rekuperá. Nos tin ku keda bei pa evitá ku e vírùs ta bolbe plama na Boneiru. Aweró dòkter Marian Luinstra lo duna mas informashon.
Ta bai bini mas pasahero for di Kòrsou i Hulanda. Dor di esaki e chèns pa kontaminashon for di afó ta krese. Pa esei tin ku mantené sierto medidanan. Pa e chèns pa hende lokal pega keda chikitu. Esaki por solamente si nos limitá nos kontaktonan ku otro. P’esei ta mihó i ta rekomendá, pa traha for di kas. Eventonan grandi pa públiko, na unda hende por pega otro, ainda no ta permití. Enkuentronan privá ku un máksimo di 10 persona presente ta permití.
Di otro banda entre otro gymnan a habri atrobe. Nan tin ku tene nan mes na e reglanan ku a pone pa nan. Mi ta hasi un yamada na espesialmente e komersiantenan ku si por habri, pa nan keda tene nan mes na e reglanan manera a indiká den e ordenansa. Tene kuenta ku e kantidat di kliente den e negoshi i no desviá for di e ora ku tin ku sera. Aworaki tur horeka, entre otro restorant i kasino, tin ku sera 10’or di anochi. Kaminda no por mantené 1.5 meter distansia ta konsehá pa bisti un tapa boka. Si e sifra di persona infektá keda abou nos por bai aki dos siman bèk na orarionan mas amplio pa ta habrí.
Mi kier bini bèk riba kondishonnan pa bini Boneiru. Awor a bira mas fásil pa bini Boneiru. Pasaheronan for di Kòrsou, Canada i Hulanda ( es desir Europa) ta bon biní. Tur hende ku kier bini Boneiru por yega for di un di e tres paisnan aki. Ku ta for di e tres paisnan aki so por bini Boneiru ta pa regulá e kantidat di pasaheronan ku ta drenta. A traha afsprak ku e kompanianan di aviashon tokante esaki. Pasaheronan tin ku mustra ku nan a hasi e PCR tèst na un di e tres paisnan di origen i ku esaki su resultado tabata negativo. E pasaheronan mester a hasi e tèst mas tardá 72 ora promé nan subi avion ku ta hiba nan Boneiru. Sino e pasahero tin ku bai den karentena obligatorio pa 14 dia. Ta hasi un eksepshon solamente pa esnan di Boneiru ku tin ku bula bai Kòrsou i bini bèk riba mesun dia pa motibu di por ehèmpel negoshi, entiero òf kasamentu. Sí, nan tin ku pidi eksonerashon na repat@bonairegov.com. Bishitantenan for di Kòrsou ku ta bini Boneiru mester presentá un resultado negativo di un PCR tèst. Paga tinu: biahamentu tin su riesgo kuné. Ta abo ta karga e riesgo finansiero si bo keda kontagiá den eksterior i tèst positivo.
Al final lo mi kier menshoná e petishon pa bai kódigo hel bèk. Algun siman pasa a pidi Hulanda pa bai kódigo oraño pa protehá salubridat públiko di Boneiru. E kódigo oraño aki kier men ku ta deskonsehá pa bini Boneiru.. Awor ku e kantidat di kasonan di Covid-19 a baha drástiko a pidi Hulanda siman pasa djamars pa bai bèk kódigo hel. Te ku aworaki nos no a haña kontesta for di Den Haag. E motibu ku e kontesta riba nos petishon ta dura asina largu, ta paso Hulanda kier bini ku un konseho pa hinter Reino. Pa haña tur hende riba mesun liña ta tuma mas tempu ku a sperá. Ta papia tur dia ku Den Haag paso nos kier un kontesta i aklarashon mas lihé ku ta posibel. Turismo kon ku bai bini ta e pilar mas importante di nos ekonomia. Ta dura mas tantu ku nos a kere p’esei ta papiando ku e sektor turístiko. Ta wak posibilidat pa otro pais komo alternativa pa Hulanda i asin‘ei tòg haña turista bini nos isla. Pronto lo mi tin mas informashon tokante esaki.
Por último. Nos a logra di baha e kantidat di persona ku lokal a pega ku e vírùs di corona hopi lihé. P’esei keda hasi manera bo a hasi e último simannan. Mantené bo mes na e reglanan di higiena. Komé kuminda saludabel, drumi sufisiente i keda den moveshon pa asin’ei hisa bo resistensia. Protehá bo mes i esnan rondó di bo.