KRALENDIJK, Bonaire
Shurman Kook, pastor i presidente di Iglesia Atventista di 7 Dia di islanan Aruba, Boneiru i Kòrsou, resientemente a publiká un buki titulá “Duna Shon Grandi su Honor”. E buki ta basá riba un mensahe di beibel i ta deskribí historia i kultura di Karibe Hulandes. Pastor Shurman kende ta outor di e buki a entregá gezaghebber Edison Rijna un ehemplar i a duna gezaghebber informashon tokante kontenido di e buki. E motibu ku a publiká e buki ta den kuadro di konmemorashon di 225 aña di e Lucha pa Libertat di 1795 ku a tuma lugá na Kòrsou.
Gezaghebber a gradisí pastor Shurman pa e buki i a keda enkantá ku e informashon tokante kontenido di e buki. Na nòmber di gobièrnu di Boneiru sr Rijna a felisitá pastor ku su obra.
Durante di e entrega di buki pastor Shurman a informá gezaghebber Rijna ku otro luna, pa ta eksakto riba djasabra 12 di sèptèmber, lo repartí e buki gratuitamente pa komunidat boneriano.
Pastoor Shurman Kook tabata akompañá pa Daniel Zuñiga kende ta tesorero di Iglesia Atventista di Aruba, Boneiru i Kòrsou i tambe Surrandy Selassa kende ta presidente di Iglesia Atventista di Boneiru.
