Mi a tuma nota di sra.Gerlien Croes, ex-Parlamentario di AVP manera semper ta papia mita berdad pa confundi pueblo riba e realidad di e tema di e Raft. Mita berdad ta un mentira completo y ta bon pa pueblo compronde e panaroma completo prome cu yega na un conclusion inspira pa ambicionan politico di desesperacion di Gerlien.
Hulanda ta probecha pandemia pa pone cuchiu na garganta di un pueblo cu hamber
Sra. Croes kier bagatalisa e hecho cu a firma un RAft caba. Ta importante pa corda con Hulanda, cu yen di hipocrecia awe ta grita “Doe het voor de Kinderen” a pone cuchiu na pueblo su garganta durante pandemia; “firma of keda sin haya e pan cu bo “kinderen” mester pa come y sobrebibi e pandemia!” Slavernij verleden? Gremionan y otronan tabata grita desesperadamente pa Minister Presidente Evelyn Wever-Croes firma pa caba na 2020! Minister Presidente a lidera Aruba memey di un pandemia global devastador cu exito, vision y determinacion. Ta pesey pueblo a sali vota masal pe tambe na 2021. Gerlien, bo tey?
Gobierno a haya instruccion di Parlamento pa negocia e miho “deal”
Recientemente Minister President y Minister di Finanzas a bin Parlamento pa splica Parlamento unda e negociacionan cu Hulanda ta actualmente. Na final Parlamento a vota 17-5 na fabor pa gobierno sigui negocia cu Hulanda pa un “mihor deal.” Ta obvio cu Gerlien no kier compronde cu 2-3 aña pasa nos hendenan a keda sin trabao y otronan tabata muriendo den nos hospital mientras Hulanda a obliga nos recorta den fondo di salud publico! Awe a presenta e oportunidad pa nos lucha hunto pa e futuro di Aruba. Aruba mester di nos tur pa nos lucha pa nos gobierno por yega na e miho “deal” cu Hulanda. Den e ley nobo nos kier sigui fortalece y sigura cu lo tin continuacion di supervision financiero, normanan realistico con pa sigura maneho responsabel di nos finanzas publico. Pero hamas Gerlien, nos por continua negocia cu un cuchiu na nos garganta. Kisas esey ta normal pa bo, pero no pe pueblo!
Flip-Flop constante di sra. Croes ta haci su credibilidad marginal
Historia di mentira y flip-flop di Gerlien; Na 2022 cu AVP manera custumber a grita cu e presupuesto 2023 tabata ficticio. Gerlien a keda sin presenta na trabao 6 dia largo na reunion publico di presupuesto 2023. CAft den su dos consehonan riba vierde UR 2022 y di conseho riba presupuesto y voorjaarsnota 2023 tabata uno cu a elogia gobierno pa cumpli cu normanan di CAft, a baha gastonan tur caminda, a elogia cu turismo a kibra record y economia a prospera, y adicionalmente e rapport ta bisa cu gobierno lo logra pa 2027 pa nos debe/GDP lo yega na 70%. Unda bo credibilidad a keda Gerlien?
Gerlien a grita cu mester a busca conseho di CAft pe cambio den presupuesto 2023, cual ponencia CAft mes a refuta publicamente y asina caba cu credibilidad di Gerlien! Gerlien a “flip” contra di Raft den AVP, pero awo sin splica a “flop” pro Raft. Gerlien, bo ta carni of bo ta pisca? Gerlien a sapatia “flip” contra BTW ora e tabata den AVP. Par di siman pasa Gerlien ta sali “flop” cu e ta “pro” BTW. Gerlien tabata den AVP e tambe a participa den e verslag unda cada partido a expresa nan “zienswijze” riba e RAft. Ken por compronde Gerlien? Gerlien a grita di lo expresa su opinion riba casonan di corupcion y condena di ex-ministernan den AVP. Pero ya nos a wak Gerlien a “flip-flop” y keda muisstil.
Gerlien su amor pa politica ta mas grandi cu amor pa pueblo su desaroyo
Sra. Croes, bo no mester ta sostenedor di Gobierno pa de bes en cuando bo duna un elogio. E ta mas cu obvio cu tin desaroyonan hopi positivo den nos pais pero claramente politikeria ta mas importante pa bo cu rapportnan di instancianan nacional y internacional cu ta elogia e bon maneho di Gobierno. Ta notabel cu tur ora Gerlien Croes ta sali pa bagatelisa bon maneho structural di gobierno. Sra. Croes ta sali flip contra surplus di 1% di presupuesto 2023 y 2024, contra surplus di AZV, ora Gobierno mantene su mes na normanan di CAft y awo tambe contra entregamento na tempo di e presupuesto 2023 y 2024. Rapportnan di CAft ta comproba esaki y ta pone Gerlien flip y sapatia.
Nos economia ta recuperando
Nos economia actualmente ta recuperando di e dos momentonan mas catastrofico den historia di pais Aruba: E Pandemia di Covid-19 y di Horcan Mike Eman. Gerlien ta declara cu pueblo no por goza di e progreso cu gobierno ta papia di dje. Notabel ta cu Gerlien ta papia di e consecuencianan di pandemia y Horcan Mike Eman, pa cual e mes a bati man p’e pa hopi aña. Danki Dios na liderasgo firme den gobierno a cuminsa paga riba e megadebe cu e surplus di 2023. Ta spera di por yega na 2027 te na 70% di nos GDP na debe cu e trend nobo di paga cu nos surplus anualmente. Pagando y bahando nos debe nacional lo libera miyones den presupuesto di nos pais, cu despues atrobe por wordo inverti den nos economia.