Despues di algun dia di silencio, Parlamentario di fraccion berde den Parlamento Gerlien Croes a haci un declaracion breve di e decision cu el a tuma.
Esaki ta un decision a causa di e reunion di partijraad di dialuna ultimo unda cu a dicidi di apoya Benny Sevinger a pesar cu el a keda condena pa dos cargo den Corte di Prome Instancia. Sevinger a anuncia cu e lo apela e decision.
Ya caba diamars mainta e Parlamentario Rycond Santos do Nascimento a informa cu el a retira di partido AVP y a declara su mes independiente. Tur hende tabata en espera di e declaracion di Gerlien Croes cu a yega awe mainta.
“Mi ta confirmando y reevaluando mi decision den futuro,” el a bisa. El a bisa esaki despues di su declaracion cu lider di partido. El a pidi tempo pa combersa cu su sostenedornan y famia prome cu e tuma un decision final.
El a bisa cu e tabata hopi desilusiona pa e reunion di dialuna ultimo na cual e no a wordo invita pa e partij bijeenkomst, siendo un miembro importante di e partido y cu a carga e partido den e ultimo dos añanan. Ta inaceptabel, entregando mi mes na partido y pueblo, cu ta falta respet. Politica ta un compromiso, mester yega na otro.
El a bisa di un reunion cu a wordo yama unda cu no a invita su persona y e ta bisa cu esey el a haya un falta di respet. “Mi ta hopi desapunta pa esey.” EL a bisa si cu decisionnan mester wordo tuma a base racional y no emocional.” El a insisti di no kier bira emocional y kier papia cu su hendenan prome. E decision no ta solamente di su persona, pero su sostenedornan Semper tabatey cu ne for di momento cu el a subi riba lista politico. Su so no por tuma un decision asina grandi, el a bisa.
Croes a expresa su mes na fabor di un sistema di politica nobo of renobacion di e politica, manera cu a wordo bisa tambe den e sentencia di Corte den e caso di Sevinger.
Cualkier decision ta na bienestar di un cambio di politica na Aruba.