Djabièrnè último durante Taste of Bonaire tabatin e kompetensia di baile folklóriko pa skol básiko kaminda 3 skol a partisipá, esta Kolegio San Luis Bertran, Kolegio Kristu Bon Wardador i Skol Amplio Papa Cornes.
Tur e skolnan akí a bin bon prepará i sigur riba un nivel haltu ku a duna e huradonan un trabou difísil pa skohe e ganador.
Resultado di e kompetensia ta lo sigiente: segundo finalista Kolegio San Luis Bertran, promé finalista Kolegio Kristu Wardador i ganador apsoluto ta Skol Amplio Papa Cornes. Miss Tourism Sunniva Manuel a hasi entrega di e premionan na e ganadornan.
Meta tras di e proyekto aki tabata pa motivá nos hóbennan riba tereno di nos kultura i nos turismo. Tur esaki tabata relashoná ku e luna di turismo i lansamentu di e di kuater edishon di e buki: Turismo na Boneiru.
Tourism Corporation Bonaire kier a yama un danki di kurason na e skolnan ku a kere den e proyekto i a duna tur di nan banda pa e proyekto por a kristalisá.
Danki na tur e personanan ku a trein e muchanan i tambe na nan dosentenan, mayornan i kosedónan. Un danki spesial ta bai pa e spònsernan ku a duna premio pa e ganadornan. Nan ta Bon Sea, Semi Submarine, Bonaire Landsailing Adventures i Ohana Clear Canoe.
