Na luna di novèmber TCB i PSV a uni forsa i a lansa un akshon di gana, kaminda dos boneriano i dos fanátiko di PSV por a gana un biahe pa respektivamente Eindhoven i Boneiru. Despues di varios luna di antisipashon, na luna di mart e ganadónan a hasi uso di nan premio i nan a gosa di un eksperiensia inolvidabel.
Señora Mariela Keller i su yu hòmber Zairick Merenciana di Boneiru tabata e felis ganadónan ku tabatin mag di biaha pa Eindhoven. Durante nan estadia nan a haña un rekorido eksklusivo den Philips Stadion, komo VIP nan a bishitá e wega ku PSV a hunga na kas kontra CAMBUUR, nan a bishitá e kompleho di entrenamentu ‘De Herdgang’ i nan a topa ku hungadónan di PSV. Tabata un oportunidat fantástiko pa e famia boneriano kompartí nan pashon pa futbòl.
Marieke i Sander, e ganadónan di Hulanda, a hospedá den Chogogo Dive & Beach Resort Bonaire i Rolando Marin di TCB a hasi un ‘tour’ riba nos isla ku nan, pa nan a deskubrí tur e bunita bistanan i e sabroso kumindanan lokal di Boneiru. Sari van Veenendaal, anterior hungadó femenino di futbòl i alabes kiper, a sòru pa un sorpresa na momentu ku, huntu ku Marjolein Oleana di TCB, el a entregá un shùrt di PSV na e ganadónan. Aktualmente Sari van Veenendaal ta na Boneiru pa e Siman di Deporte i e tambe a djòin e ganadónan den e tour riba nos isla.
Boneiru i PSV ta anhelá pa lansa mas di e inisiativanan akí den futuro i fortifiká nan relashon mas aleu.
![Ganadónan Di E Akshon Di Gana Di Boneiru I Psv Ta Eksperensiá E Biahe Di Nan Soño Pa Boneiru I Eindhoven! 155 Ganadonan Di E Akshon Di Gana Di Boneiru I Psv](https://www.eanews.com/wp-content/uploads/2023/04/Ganadonan-di-e-akshon-di-gana-di-Boneiru-i-PSV.jpg)