Sidney Ponson Charity Foundation ta ranca sali na grandi cu nan prome evento pa recauda fondo. Ta trata aki di un evento internacional cu ta carga e nomber di “1st Annual 2021 Aruba International Wahoo Shootout.
E participante cu dal e grandslam ta bay cu e premio grandi di 25 mil florin. Esaki ta pa e boto cu a trece mas pisca aden, den peso.
SPCF pa medio di esaki ta invita tur amante di pesca pa registra nan participacion trempan pa e torneo cu lo tuma luga riba diasabra, 4 di december, 2021. E ta un competencia di Wahoo, Kingfish, Dorado y Baracuda, E Ganado lo ta e boto cu trece e 4 piscanan mas grandi di e torneo. No lubida cu nan mester ta 8KG of mas.
E famoso pelotero Sidney Ponson, un amante di pesca, pa medio di e torneo aki kier logra diferente meta. Na prome luga yuda muchanan di Aruba den ramo di deporte, pero tambe pone nomber di Aruba riba scenario internacional cu un torneo di pesca asina grandi.
Ta bay tin diferente premio (efectivo como trofeo) y categoria. E premionan pa botonan chikito y grandi ta: prome premio ta 6 mil florin; di dos luga ta bay cu 4 mil florin y esun cu a keda na di tres luga ta ricibi 2 mil florin. Pa e boto cu gara e Wahoo, Dorado, King Fish of Baracuda di mas grandi ta gana 500 florin.
Banda di e premionan ariba menciona, tin un categoria adicional cu ta pa recauda fondo pa Sidney Ponson Charity Foundation. E competencia di Blue Marlin ta uno adicional y ta valido solamente pa e botonan di 32 pia bay ariba. Cada boto ta paga 500 pa participa den e seccion aki di cual 10% ta bay pa SPCF y e resto ta pa e ganado. E Blue Marlin mester ta 300 liber bay ariba.
For di awo caba esnan interesa por cuminsa registra y manda nan datonan pa: sidney.spcf@gmail.com of na carlmichael.spcf@gmail.com of na 699-3839 y 699-382. Inscripcion ta costa 1000 florin. Tin e posibilidad pa haci esaki den cuatro pago cu mester completa no mas laat cu 22 november.
E torneo ta un bon momento pa practica bo deporte faborito y na mesun momento contribui cu un bon causa.
