E pandemia di COVID na momento cu e la presenta na Aruba, mester a cera frontera,no tabata un temporada facil pa Aruba, pero mester a pasa door di dje. Mester a cera frontera y no por a ricibi ningun turista mas. Hopi di nos tabata nervioso y preocupa di kico lo bay pasa. Sinembargo awe por mira cu Aruba a sali padilanti danki na e turismo cu nos tin. Un grupo grandi den nos comunidad ta biba di turismo y Aruba ta conoci pa nos cordialidad, e ta den nos himno hancra, paso esey ta un di e caracteristicanan cu a haci Aruba asina exitoso.
Prome Minister Evelyn Wever Croes ta indica cu ta compronde e preocupacion riba e punto di Overtourism y ta comparti e preocupacionnan riba e parti aki. Mirando esaki gobierno a tuma decisionnan pa stop y frena esaki den diferente aspecto.
Actualmente Aruba no ta duna tereno y ningun permiso mas pa hotel. Na momento cu gabinete Wever Croes a drenta den gobierno a haya den careda di 8 mil camber duna y poco poco a keda baha e cantidad di cambernan. Esaki a conduci diferente casonan den corte unda cu tin personanan cu ta forsa tog pa haya e promesa cu a keda priminti na nan door di e gobierno prome cu Gabinete Wever Croes. Te ainda por bisa cu ta bringando den corte constantemente paso tampoco no ta desea overtourism. Tin algun proyecto grandi cu a finalisa e aña aki y tin algun ainda den liña pa keda concretisa cu ta compromisonan anterior duna cu o por a wordo kita , pero despues di e grupo aki cu a haya tereno di e gobierno anterior no lo tin mas permiso cu ta keda duna pa construi hotel.
Aruba tin un parti grandi di nos comunidad unda cu mas di 30 % di henter nos isla cu ta protegi pa nos naturalesa y esey no ta bay cambia. Segun prome minister Evelyn Wever Croes tin un 20 % mas cu por wordo construi pero den balance cu naturalesa. Ta un parti chikito so di Aruba por keda construi y lamentablemente esey tambe ta yenando. E preocupacionnan cu tin ta conoci y ta comparti nan unda cu gabinete Wever Croes tambe ta preocupa cu e fenomeno aki.
Sinembargo hunto nos mester busca un solucion , agredi,ataca,insulta nos turistanan no ta e solucion. Esaki ta contra nos DNA y contra di nos principionan. Nos mester ta cordial cu otro , tanto e local cu e localnan , pero tambe cu e turistanan cu ta bin bishita y disfruta di nos pida baranca.