ORANJESTAD, Aruba
Mundo medico y cuido den fin di siman a haya un golpi formal y hopi duro pa loke ta su credibilidad, na momento c’un lista di nomber di ciudadanonan cu a test positivo pa e corona virus, a leak den medionan social.
Parlamentario Arthur Dowers a mustra cu henter e asunto aki ta algo tragico, algo sin precedente y caminda su persona ta kere cu gobierno ta responsabel pa e eror grandi aki y cu lo ta na su luga pa Minister di Salubridad Publico, saca su conclusion.
“Ta e Minister di Salubridad ta esun responsabel pa e asunto aki pero ya nos por mira con gobierno ta buscando kende nan por bay culpa pero e responsabel mayor di e asunto aki, ta e minister di salud.
Di con? Na prome luga nos por a tuma nota cu dos of tres siman pasa a Sali publica riba social media c’un persona trahando den oficina di Minister Presidente, trahando pa gobierno di Aruba den Cocolishi, a saca informacion priva di hende cu a test positivo riba corona virus.
Gobierno e tempo ey a keda keto, haci mescos cu nan nanishi ta sangra y no a haci ningun publicacion riba e incidente aki y tampoco a laga haci un investigacion.
Awor ta bin resulta cu no ta for di awe e lekmento aki ta tumando luga pero for di basta dia caba tin lista di personanan kendenan a haci test pa corona virus, cu ta den man di hendenan cu no tin ningun autoridad pa tin e documentonan aki.
Laga nos ta honesto, ley ta stipula cu esunnan cu ta traha den mundo medico y salud, ta huramente cu nan tin cu tene tur informacion cu yega na nan conocemento, cu nan sa e caracter secreto di dje of cu ta wordo bisa cu e ta secreto, nan mester tene esakinan secreto.
Ningun di nan sinta den bestuurskantoor y Dangui Oduber no ta medico y no a studia nada riba tereno di salud, su persona no por yega na ningun informacion di pashent pa motibo cu e no a huramenta como medico, ni tampoco Evelyn Wever Croes y ningun di nan den Cocolishi.
Pues e informacion aki mester keda den man di profesionalnan y ki mishi e informacion aki yega den man di bestuurskantoor te cu nan a sake y te cu nan a bin pidi dispensa cu nan a sake, ya cu nan a bira nervioso.
Mi ta kere cu e cos aki ta algo cu mester a wordo investiga for di mas di tres siman pasa caba y cu lo mester tabatin consecuencia pero e no tabatin ningun consecuencia y awor akinan cu e lista completo a sali, aworaki si kier bay cuminsa c’un investigacion y e parti mas tristo ta cu a cuminsa acusa hende for di prome cu e investigacion a inicia, ya caba a cuminsa acusa cierto ambtenaarnan cu ta nan lo a saca e informacion aki.
E cos aki no ta algo cu ta pas den un democracia, no ta pas den un sistema democratico cu nos conoce y e sistema di responsabilidad politico.
E sistema di responsabilidad politico ta hiba cune cu esun cu ta politicamente responsabel, cu no a haci nada ora cu e prome lekmento a tuma luga, e ta esun cu mester saca su conclusion.
Ora cu mi bisa cu e tin cu saca su conclusion no kiermen mi kier e baha como Minister pero aki mi ta mustra cu bo mes hendenan a saca informacion priva di hende den comunidad, nan a admiti di a saca e informacion y abo como gobierno y como Minister, ni Minister Presidente ni e Minister di Salubridad, ningun di dos a tuma ningun medida pa para esaki.
Loke ta mas tristo ta e hecho cu por compronde cu tin un grupo di hende cu ta traha den e team di calamidad y e team di calamidad aki tampoco ta autorisa pa ricibi informacion priva di hende y unico cos cu nan tin ricib, ta cifra di cuanto hende tin cu e virus, informacion den cua bario, cual area, unda nan a wordo contamina, esey ta e unico informacion cu e crisisteam por ricibi pero no nomber di hende, ta algo cu hamas y nunca nan por ricibi.
Kico ta bay tin despues di esaki? Ki mas informacion priva di hende e hendenan aki cu ta forma parti di e grupo aki, ta bay saca?
E cos aki ta algo cu ta imposibel pa nos guli manda abou y nos kier mira medidanan rapido ya cu tin cu corda cu tin bista di hopi hende, incluso di Hulanda, cu ta bin riba nos aworaki ki paso lo wordo tuma.
Pero dia tras di dia gobierno ta keda blunder tras di blunder y gobierno no ta tuma ningun medida pa coregi e blundernan aki y como consecuencia cu dado momento e hemchi lo yena te bay over y e ora lo core bisa cu nos no tabata sa miho, nos no por miho.
Anto e ora ta core bay entrega tur loke tin cu entrega y aki no mester lubida cu Hulanda lo pensa riba pa kita maneho di salubridad publico, pa kita enseñansa, husticia a wordo kita caba y a kita e parti financiero economico caba.
Mas aki rato tur loke lo resta gabinete Wever Croes ta e ministerio di asunto social so pa motibo cu tur otro cartera ta wordo kita pa Hulanda pa motibo cu e gobierno aki ta comete blunder tras di blunder y ta di spera cu e minister di salud lo bin c’un contesta mas drechi pa duna nos cu e argumento fofo cu esunnan cu a haci e blunder aki no ta di su partido, cu ta algo hopi baho pa bisa, pero Sali bin dilanti y asumi bo responsabilidad,” Parlamentario Arthur Dowers a declara.
