ORANJESTAD,Aruba
Lider di fraccion di fraccion di AVP, sr Marlon Sneek a mustra diamars mainta cu Minister di Enseñansa ta manipulando c’un ‘Ministeriele Beschikking’ cu ta data for di 2015, pa asina dicidi di manda 100 mama di famia cas kendenan ta encarga cu trabou di limpiesa di scolnan.
Un hecho condenabel, un decision cruel caminda den un tempo asina dificil na e momentonan aki pa henter e pais, un minister na nomber di gabinete Wever Croes, ta dicidi cu Juni lo bira e ultimo luna di trabou di ‘werksternan’ den servicio di SKOA.
“Minister Lampe a dicidi di scondi tras di un ministeriele beschikking di 2015 caminda gobierno anterior a traha e ministeriele beschikking aki y tur hende por corda discusionnan cu tabatin enter gobierno i SKOA, pa loke ta subsidionan cu SKOA tabata claim cu e tabatin derecho ariba, y cu gobierno no a paga.
Gobierno e tempo ey a traha e ministeriele beschikking aki pa trata un par di punto y ta trata di cuater punto cu a atende cu nan: – Het nog door het Land aan SKOA verschuldingd subsidiebedrag van 2014 van half miljoen, wordt per direct door financien uitbetaald.
Pues gobierno a paga SKOA na 2014 mey miyon florin pasobra SKOA tabata claim cu gobierno debe nan y gobierno a paga e suma aki y gobierno a dicidi e tempo ey pa loke ta e subsidionan di 2004 pa 2013, SKOA mester a presenta cu cuentanan anual y hunto cu financien discuto kico gobierno debe nan ainda pa asina por bay paga esaki.
Otro punto cu tambe tabata den e ministeriele beschikking ta: – ingaande 2015 wordt de kosten van de werksters opgenomen in de te subsidierende bedrag ten behoefte van di SKOA.
Desde 2015 e sumanan pa paga e werksternan ta wordo aloca pa di e forma aki wordo duna como un subsidio na SKOA pa su werksternan.
Awe nos ta na e crusada caminda un total di 100 persona ta bay perde nan trabou pasobra Minister a tuma su decision caba, cu te cu juni e ta bay subsidia SKOA pa loke ta salario di werksternan, usando un excusa fofo bisando cu e suma ta aloca bou di exploitatiesubsidie y no bou di salaris subsidie.
E cos ta masha simpel, ya cu Lampe como Minister tin cu bisa pa cambia e post aki ya cu ta su persona ta traha e presupuesto di enseñansa y solamente e tin cu bisa nan cambia e post aki y pone directamente bou di salaris subsidie.
Pero no, Lampe a scoge como minister, y e tin cu para pa esaki ya cu cada bes nos por mira cu e minister kier colga na saya di AVP, bisando cu ta un decision robes, pero Lampe ta un minister cu ta bay haci tres aña sinta riba e stoel ey y ainda e ta yora riba cosnan di ayera.
Abo ta e minister, abo ta e ‘bevoegdgezag’ y si abo ta kere cu e werksternan aki merece di haya un salario digno, mescos cu e gobierno anterior a dicidi, anto bo mester a caba di regla den mesun forma cu bo a regla 1.5 miyon pa De Schakel College, bo por a regla pa e werksternan di SKOA tambe por keda den servicio, keda cu nan trabou.
Pero esey Minister Lampe no kier regla, bo kier hunga politica barata, bisa cu ta AVP lo a traha un Landsbesluit robes, un MB robes pero no abo ta e minister responsabel, abo ta e bevoegdgezag y si bo ta kere cu e werksternan di SKOA merece cu e werksternan di cualkier otro stichting, mescos cu e werksternan di openbare scholen, cu nan mag di ta den dienst y haya un salario digno, bo ta firme y bo ta hacie.
No Minister Lampe kier spaar, bo kier spaar riba cabes di 100 mama di famia, esey ta loke bo kier haci, pasobra despues di Juni, un total di 100 mama di famia lo wordo manda cas pa motibo cu minister Lampe kier show cu e por baha su cantidad di personal.
Tur e show aki sacrificando 100 mama di famia y e cosnan aki ta inaceptabel y awor sconde tras di un MB cu nunca a papia di un cabamento di subsidio di salario pa werksternan pero e MB ta papia di reconcimento cu gobierno tin y gobierno ta un continuidad y ta un reconocimento di gobierno di Mike Eman a duna na e werksternan aki pa e trabou cu nan ta haci.
Awor mas cu nunca den e situacion di covid-19 aki, e minister kier manda werksternan cas, ta kende ta bay haci e klasnan limpi? E maestronan di scol mester haci esaki?
Un locura di otro mundo y si minister Lampe ta kere den su maneho, e para pa esaki y bin dilanti y bisa cu su persona kier manda 100 werkster cas,” lider di fraccion di AVP, Marlon Sneek a declara.
