KRALENDIJK,Bonaire
No tin mester di kombensé bonerianonan kon balioso naturalesa ta. Esaki pasobra prosperidat i bienestar riba nos isla den un grado importante ta dependiente di nos flora i founa ekstraordinario, entre otro un rikesa sin presedente na koral. Na aña 1960 kaba Boneiru konsientemente a skohe pa un desaroyo sostenibel ku preservashon di kultura i naturalesa. 50 aña pasá e anterior plantashi Washington a haña státus di parke nashonal i 10 aña despues e parke marino a sigui.
Por lo tantu komo Kolegio Ehekutivo nos por haña nos mes den e Plan di Maneho pa Naturalesa i Medio Ambiente Hulanda Karibense ku dia 24 di aprel último gabinete hulandes a publiká i ku ta konektá perfektamente riba nos propio Plan di Naturalesa Boneiru ku resientemente nos a presentá na Konseho Insular pa aprobashon. Naturalesa na Boneiru no ta di balor pa Hulanda so, pero pa henter mundu, asina gobièrnu hulandes ta enfatisá. Enberdat Boneiru tin ekosistemanan úniko, na kua nos ta gradisí entre otro nos fama komo paradiso pa sambuyadó.
Ophetivo di e Plan di Maneho pa Naturalesa i Medio Ambiente ta pa promové preservashon i rekuperashon di naturalesa na Boneiru i nos islanan ruman Sint Eustatius i Saba. Na tur tres isla naturalesa ta bou di preshon. Asina por bisa ku kalidat di e refnan di koral i ku esei henter bida bou di laman durante e último dékadanan a deteriorá konsiderabelmente.
E menasa ta bini prinsipalmente di pafó: kontaminashon di oséanonan, entre otro pa motibu di bashamentu di awa shushi no-purifiká i otro tipo di shushi, manera kantidatnan enorme di plèstik. Kambio di klima ta hasi esaki mas pió ainda. Riba tera ta e miles di kabritu i buriku ku ta kana lòs ku ta kometé un asalto riba nos biodiversidat.
E plan di maneho pa naturalesa di gobièrnu hulandes no por a stòp e desaroyo aki sufisientemente. A bira tempu pues pa un vershon nobo ku medidanan ku ta bai mas leu. Entretantu protehá so no ta sufisiente mas, mester invertí tambe fuertemente den rekuperashon. Den e sentido aki e plan ta kompletamente den liña ku nos ambishon pa bira un Blue Destination, kaminda un desaroyo sostenibel ku preservashon di naturalesa i kultura ta para sentral.
Vários ministerio, asina e plan ta mustra, ta dispuesto pa den e añanan binidero kontribuí finansieramente pa salbaguardá naturalesa i mehorá medio ambiente na Hulanda Karibense. No ta fásil pa determiná si e suma ku nan ta primintí ta sufisiente, pero e konklushon ku for di awor por saka kaba ta ku e kontribushon di Boneiru mes no por ta grandi.
E kompensashon liber ku anualmente nos ta risibí for di e fondo di BES pa hopi aña kaba ta muchu abou pa por ehekutá nos tareanan insular manera mester ta, prinsipalmente den kaso di eliminashon di retraso. E echo aki ta obligá Kolegio Ehekutivo pa hasi eskohonan imposibel for di un kantidat grandi di prioridat, un mas urgente ku otro.
Banda di esei durante e último añanan pobresa a oumentá konsiderabelmente. Ya for di promé ku krísis di corona 4 di kada 10 kas di famia tabatin un entrada ku ta bou di e mínimo di eksistensia. Ministerio di Asuntunan Sosial i Empleo a primintí di tapa e buraku entre sueldo mínimo i ònderstant i loke ta nesesario pa alkansá fin di luna, pero pa hopi aña ainda hopi boneriano na promé lugá lo tin ku wak kon pa sobrebibí. Nan tin hopi otro preokupashon ku no ta naturalesa.
Un otro sirkumstansia ta kresementu di poblashon. Prinsipalmente pa motibu di imigrashon esaki den 10 aña di tempu a oumentá di 13.000 pa mas òf ménos 21.000. Un kresementu mas aleu, manera Ofisina Sentral di Estadístika ta pronostiká, ta nifiká mas kas, mas infrastruktura, mas uso di koriente, mas shushi… Esaki ta suprayá e nesesidat pa un maneho di establesimentu duradero, tambe na interes di outentisidat di nos isla.
I awor nos turismo: nos ta para pa un kresementu responsabel i paralelo na esei nos ke kambia e aksento i poné riba turismo di kalidat, riba bishitantenan ku ta bini pa e karakterístikanan di e Boneiru outéntiko: naturalesa, kultura i trankilidat. Esei no ta bai di un dia pa otro. Nos no por eliminá e entradanan di e tipo aktual di turismo krusero i e aporte di esei na empleo den un solo tiru. Pa medio di maneho di preis (oumentá impuesto pa pasaheronan krusero) i mehorashon di produkto nos ta purba atraé un grupo di enfoke mas selektivo ku, pa loke ta trata tamaño i interes, ta pas mas mihó serka Boneiru.
Un otro realidat ta e forsa di ehekushon di e aparato gubernamental insular. Komo konsekuensia di e Akuerdo Intergubernamental ku ministerio di Asuntunan Interno i Relashonnan den Reino nos a kuminsá un trayekto pa mehorá esaki. Sinembargo por lo pronto e departamentu ku ta okupá su mes ku naturalesa i medio ambiente no ta sufisientemente ekipá pa duna un aporte signifikativo na ehekushon di e Plan di Maneho pa Naturalesa i Medio Ambiente.
Si gabinete hulandes realmente ta haña naturalesa di Boneiru asina balioso manera nan a formulá den e Plan di Maneho pa Naturalesa i Medio Ambiente, e ora ei ta bon si e mandatarionan konserní sigui ehèmpel di ministerio di Enseñansa, Kultura i Siensia ku den término di algun aña a logra hisa kalidat di enseñansa na Hulanda Karibense for di leu bou di nivel te na un sufisiente fuerte.
Na e momentunan aki tur nos atenshon i energia ta dirigí riba salú públiko i suavisashon di e impakto sosial i ekonómiko di e krísis di corona. Esaki no ta nifiká ku nos komo Kolegio Ehekutivo di Boneiru no ta dispuesto pa hasi tur loke ta na nos alkanse pa salba un di e ekosistemanan mas ekstraordinario den henter reino hulandes. Nos ta verwagt meskos di gabinete hulandes.
Kolegio Ehekutivo di Boneiru
