Gabinete ta apoya islanan cu programa di inversion

Hulanda ta pone programanan di inversion disponibel pa e Paisnan Corsou, Aruba y Sint Maarten y pa Hulanda Caribense: Bonaire, Saba y Sint Eustatius. E inversionnan mester duna como resultado cu ta fortalece e potencial di crecemento economico, ta aumenta independencia financiero y economico di e seis islanan, ta acelera transicion energetico y ta mehora nivel di bida y empleo. Haciendo esaki, Gabinete ta duna contenido na un di e palabracionnan di e acuerdo di coalicion.

Programa di inversion Corsou, Aruba y Sint Maarten

Pa contribui na desaroyo economico di Corsou, Aruba y Sint Maarten, Hulanda ta reserva en total maximal 200 miyon Euro di e Nationaal Groeifonds (NGF). Pa bin na remarke pa e fondonan, e Paisnan por entrega proyecto cu ta demostra cu nan tin un impacto grandi riba e capacidad di e paisnan pa generá prosperidat i bienestar duradero. Condicion ta cu mester trata di proposicionnan di calidad halto pa proyectonan den area di adaptacion di clima y transicion energetico, educacion, digitalisacion di gobierno, infrastructura basico (infrastructura logistico, purificacion di awa y procesamento di sushi), produccion eficiente di alimento y sostenibilidad di economia (specialmente turismo). Ta pone e recursonan di Nationaal Groeifonds disponibel den dos tranche di 100 miyon Euro. Una bes cu e fondonan di e prome tranche ta asigna den su totalidad, Corsou, Aruba y Sint Maarten por haci un apelacion riba e di dos tranche di otro 100 miyon Euro. Ta elabora e programa di inversion tambe a base di consulta cu e Paisnan. Despues di consulta cu e Paisnan e lunanan benidero, ta elabora e programa di inversion. 

Transicion di energia y areglo di garantia

Pa stimula transicion energetico, ta reserva recursonan di Stimulering Duurzame Energieproductie en Klimaattransitie  (SDE++)-  pa inverti den un of mas proyecto eficiente na Corsou, Aruba y Sint Maarten. Ta trata di proyectonan cu mester bay duna un contribucion substancial na transicion energetico di e Paisnan. Meta ta pa reduci emision di CO2 y/of stimula produccion di energia sostenibel. TNO ta inicia un estudio den zomer pa determina cua proyecto por ta adecuado. Esaki ta inclui, por ehempel, aumento di e capacidad di energia solar y di biento, di manera cu un gran parti di e produccion di coriente por tuma luga di manera sostenibel y cu menos costo pa empresa y consumidor. Esaki ta haci produccion y exportacion di hidrogeno mas interesante tambe.

 Finalmente, gobierno ta desaroya un areglo di garantia na midi pa stimula dunamento di prestamo na empresanan sano na Corsou, Aruba y Sint Maarten. Areglonan di garantia ta yuda empresanan crece pa motibo cu pa e meta aki nan por haña prestamonan mas facil y/of mas economico. Na e momento aki, no ta existi tipo di areglonan asina na Corsou, Aruba y Sint Maarten. Contrario na Hulanda, ta habri e areglo di garantia pa empresanan di por ehempel, agricultura y pesca. Esaki ta necesario pasobra e islanan ta sigui depende masha hopi mes di importacion di fruta y berdura fresco for di exterior.

Hulanda Caribense

Bonaire, Saba y Sint Eustatius ya ta bin na remarke caba pa recursonan for di tanto Nationaal Groeifonds como SDE++ y un areglo di garantia. Pa mehora acceso na e areglonan di subsidio y areglo di garantia, Gabinete lo proporciona trabou na midi pa e islanan aki tambe.

Pa e motibu ey Gabinete ta pone 30 miyon Euro for di NGF na disposicion di Hulanda Caribense y ta desaroya un programa separa pa fortifica e capacidad di e paisnan pa genera prosperidat i bienestar duradero di Hulanda Caribense. Pa motibo cu Bonaire, Sint Eustatius y Saba, mescos cu e Paisnan, tin un structura economico fragil cu ta depende pa gran parti di turismo y importacion, e temanan pa Hulanda Caribense lo ta similar na esnan di Corsou, Aruba y Sint Maarten.

Banda di esey Hulanda ta pone tambe 33,6 miyon Euro di e subsidio di SDE++- y di e Regio Enveloppe na disposicion di Caribe Hulandes. Cu esaki, ya ta realisando proyectonan na midi pa haci generacion di energia sostenibel. Na e momentonan aki, ta construyendo un parke solar nobo na Bonaire cu mas di 10.000 panel solar, bon pa 5000 hogar. 

Na e momentonan aki empresanan na Hulanda Caribense apenas ta haci uzo di e ‘Borgstelling MKB-kredieten’ (BMKB), a pesar cu a adapta e schema na e contexto y demanda local. Hunto cu e Entidadnan Publico, lo bay pone e areglo di garantia mas bou di atencion di empresa- y financiadonan bancario y no-bancario. Di e forma aki e prestamonan na mundo empresarial local por aumenta, di manera cu nan por inverti mas.

Continuacion

Den e proximo lunanan lo sigui elabora e tres programanan pa e Paisnan Corsou, Aruba y Sint Maarten y lo desaroya mas trabou na midi pa Hulanda Caribense. Prome cu zomer, lo inicia conversacionnan cu e Paisna y Hulanda Caribense pa discuti e cuadronan esensial di e tres instrumentonan y identifica proyectonan concreto. Tambe lo wak con por sostene e Paisnan y Hulanda Caribense eficazmente ora di desaroya y ehecuta proyecto.